ممبئی
'لاک اپ سیزن 2' کے آنے والے "ججمنٹ ڈے" ایپی سوڈ میں زبردست ہنگامہ اور ڈرامہ دیکھنے کو ملے گا، کیونکہ سابق میزبان کنگنا رناوت 'جنتا کی آواز' کے طور پر شو میں واپسی کر رہی ہیں۔ تازہ پرومو میں کنگنا، مقابلہ کنندہ رام کپور سے گھر کے اندر ان کی کارکردگی اور رویے پر سخت سوالات کرتی نظر آ رہی ہیں۔
پانچویں ایپی سوڈ کے بعد جاری کیے گئے پرومو میں کنگنا سیزن کے پہلے اخراج سے قبل مقابلہ کنندگان کے اب تک کے سفر کا جائزہ لیتی ہوئی دکھائی دیتی ہیں۔ قیدیوں سے گفتگو کے دوران وہ رام کپور کی طرف متوجہ ہو کر سوال کرتی ہیں کہ آیا وہ اس مقابلے کو سنجیدگی سے لے رہے ہیں یا نہیں۔
کنگنا، رام سے کہتی ہیں کہ رام، اگر آپ کو گیم سنجیدگی سے نہیں لینا تھا، اور اگر آپ کو لگتا ہے کہ آپ اس جیل کے لیے بہت بڑے ہیں، تو پھر آپ یہاں آئے ہی کیوں؟ کیا اپنی یہ بھونڈی حرکتیں دکھانے کے لیے؟
اس پر رام جواب دیتے ہیں کہ جب وقت آئے گا، تو میں بھی اپنی سچائی قبول کروں گا، اور یہاں موجود کسی بھی شخص سے بہتر طریقے سے کروں گا۔" تاہم، اس سے پہلے کہ وہ اپنی بات مکمل کرتے، کنگنا انہیں روک کر کہتی ہیں، "اگر آپ خود کو بہتر بنانا چاہتے ہیں، تو اپنا دفاع مت کیجیے۔
یہ پہلا موقع نہیں ہے جب رام کپور کے کھیل پر سوالات اٹھائے گئے ہوں۔ اس سے قبل شو کے میزبان فرح خان اور رتیش دیشمکھ بھی انہیں اپنے رویے اور حکمتِ عملی پر نظرِ ثانی کرنے کا مشورہ دے چکے ہیں۔ تاہم، رام نے واضح کیا تھا کہ وہ گھر کے اندر اپنا رویہ تبدیل نہیں کریں گے۔
آنے والے ایپی سوڈ میں کنگنا مقابلہ کنندگان کی پہلے ہفتے کی کارکردگی کا جائزہ لینے کے بعد سیزن کے پہلے اخراج کا اعلان بھی کریں گی۔ یہ ایپی سوڈ 4 جولائی کو نشر کیا جائے گا۔دوسری جانب، سنیتا آہوجا، ہرشد چوپڑا اور آکانکشا چودھری نے خود کو اخراج سے محفوظ کر لیا ہے، جبکہ شریا کالرا، صوفی موتی والا، شریستھا آئیر، آکانکشا چمولا اور مادھوری گروور اب بھی خطرے کے زون میں موجود ہیں۔
فرح خان اور رتیش دیشمکھ کی میزبانی میں پیش کیے جانے والے 'لاک اپ: سچ یا سزا' میں ٹیلی ویژن، سوشل میڈیا اور تفریحی صنعت سے تعلق رکھنے والے 15 مقابلہ کنندگان شامل ہیں۔ یہ ریئلٹی شو ہر ہفتے ہفتہ سے بدھ تک رات 8 بجے نیٹ فلکس پر نشر کیا جاتا ہے۔
