نئی دہلی
ہندی سنیما کے عظیم اداکار دھرمیندر کے انتقال کے بعد دیول خاندان اب بھی گہرے غم میں ڈوبا ہوا ہے۔ 90 برس کی عمر میں دنیا کو الوداع کہنے والے دھرمیندر طویل عرصے سے عمر سے متعلق مختلف بیماریوں میں مبتلا تھے۔ ان کے انتقال نے پوری فلمی دنیا کو سوگوار کر دیا تھا۔ اب اداکار بوبی دیول نے اپنے والد کو یاد کرتے ہوئے دل کو چھو لینے والی باتیں شیئر کی ہیں۔
حال ہی میں بوبی دیول اداکار شیکھر سمن کے ٹاک شو میں شریک ہوئے تھے۔ گفتگو کے دوران جب ان سے پوچھا گیا کہ وہ اپنے والد کی کون سی یاد ہمیشہ اپنے دل میں محفوظ رکھنا چاہیں گے تو بوبی خود پر قابو نہ رکھ سکے۔ کیمرے کے سامنے ان کی آنکھیں نم ہو گئیں اور وہ جذباتی ہو گئے۔
بوبی نے اشک بار آنکھوں کے ساتھ کہا کہ میرے لیے اپنے والد کی کسی ایک یاد کا انتخاب کرنا بہت مشکل ہے۔ ان سے جڑی ہر بات یاد رکھنے کے قابل ہے۔ ان کے ساتھ گزارا گیا ہر لمحہ ہمارے لیے خاص تھا۔ انہوں نے ہمیشہ ہمیں محبت دی۔ یہاں تک کہ جب وہ ناراض ہوتے تھے تو ان کے غصے میں بھی اپنائیت اور شفقت چھپی ہوتی تھی۔
انہوں نے مزید کہا کہ ان کے والد صرف ایک بڑے اداکار ہی نہیں تھے بلکہ نہایت سادہ اور مخلص انسان بھی تھے۔ بوبی نے بتایا کہ دھرمیندر اپنے مداحوں سے بے حد محبت کرتے تھے اور ہمیشہ ان کے ساتھ جڑے رہنے کی کوشش کرتے تھے۔
بوبی نے کہا کہ اتنے بڑے سپر اسٹار ہونے کے باوجود میرے والد نہایت سادہ زندگی گزارتے تھے۔ سوشل میڈیا پر بھی وہ خود اپنے مداحوں سے بات چیت کرتے تھے۔ انہیں اپنے فارم ہاؤس پر لے جانا اور ان سے ملاقات کرنا بہت پسند تھا۔ ان کی شخصیت میں کسی قسم کا بناوٹ یا دکھاوا نہیں تھا۔
دھرمیندر کے انتقال نے بالی ووڈ کو گہرا صدمہ پہنچایا تھا۔ ان کی آخری رسومات میں فلمی دنیا کی کئی بڑی شخصیات نے شرکت کی تھی۔ امیتابھ بچن، سلمان خان، شاہ رخ خان، عامر خان اور انیل کپور سمیت متعدد فنکاروں نے انہیں خراجِ عقیدت پیش کیا تھا۔نئی نسل کے فنکاروں میں رنویر سنگھ، دپیکا پڈوکون اور اگستیہ نندا بھی انہیں آخری الوداع کہنے کے لیے موجود تھے۔
دھرمیندر نے اپنے طویل فلمی کیریئر کے دوران کئی یادگار فلموں میں کام کیا اور ہندی سنیما میں اپنی منفرد شناخت قائم کی۔ ان کی سادگی، اداکاری اور انسان دوستی کا ذکر آج بھی احترام کے ساتھ کیا جاتا ہے۔
بوبی دیول کے لیے ان کے والد صرف ایک عظیم اداکار نہیں بلکہ زندگی کی سب سے بڑی تحریک بھی تھے۔ انہوں نے کہا کہ والد کی نصیحتیں اور ان کی محبت ہمیشہ ان کے ساتھ رہیں گی۔ یہی یادیں اب ان کی زندگی کی سب سے بڑی طاقت بن چکی ہیں۔
_(1).webp "میرے والد کی ہر یاد میرے دل کے قریب ہے: بوبی دیول")
