ممبئی:عمران ہاشمی کی فلم 'آوارہ پن' کی پہچان اس کی موسیقی تھی اور اب اس کے سیکوئل 'آوارہ پن 2' سے بھی اسی روایت کو آگے بڑھانے کی توقع کی جا رہی ہے۔منگل کو 'آوارہ پن 2' کا پہلا گانا 'وے جنون' جاری کر دیا گیا۔ اس گانے کی موسیقی متھون نے ترتیب دی ہے جبکہ بول سید قادری نے لکھے ہیں۔ اسے سبودھ شرما نے اپنی آواز دی ہے۔
متھون نے ایک پریس نوٹ میں کہا کہ 'آوارہ پن 2' کی موسیقی تخلیق کرنا ان کے لیے ایک خاص تخلیقی تجربہ رہا۔ انہوں نے کہا کہ وشیش بھٹ جذبات سے بھرپور دنیا تخلیق کرتے ہیں جبکہ سید قادری پیچیدہ احساسات کو سادہ اور ذاتی انداز میں لفظوں میں ڈھالنے کی غیر معمولی صلاحیت رکھتے ہیں۔
انہوں نے مزید کہا کہ 'وے جنون' کے لیے ایسی آواز درکار تھی جس میں درد اور کمزوری کے ساتھ ساتھ اندرونی مضبوطی بھی محسوس ہو۔ جب انہوں نے سبودھ شرما کی آواز سنی تو اس میں ایسی سچائی محسوس ہوئی جو گانے کے جذبات سے فوراً جڑ گئی۔ ان کے مطابق یہی فطری تعلق سب سے زیادہ اہم تھا۔
فلم کے پروڈیوسر وشیش بھٹ نے کہا کہ 'آوارہ پن' کی موسیقی ایک پوری نسل کی جذباتی یادوں کا حصہ ہے۔ 'آوارہ پن 2' کے لیے اسی جادو کو دوبارہ تخلیق کرنے کے لیے متھون کی موسیقی اور سید قادری کی شاعری ضروری تھی۔ انہوں نے کہا کہ 'وے جنون' ان دونوں کی تخلیقی صلاحیتوں کا نتیجہ ہے جسے سبودھ شرما کی آواز نے مزید مؤثر بنا دیا ہے۔ ان کے مطابق سبودھ کی آواز میں ایک منفرد اور فطری کیفیت ہے جو سیکھنے سے حاصل نہیں کی جا سکتی۔
ہدایت کار نتن ککڑ کی اس فلم میں شیوَم پنڈت کی کہانی کو آگے بڑھایا جائے گا اور اس فرنچائز میں ایک نیا باب شامل کیا جائے گا۔
اصل فلم 'آوارہ پن' کی ہدایت کاری موہت سوری نے کی تھی اور یہ 29 جون 2007 کو ریلیز ہوئی تھی۔ فلم میں عمران ہاشمی اور شریا سرن نے مرکزی کردار ادا کیے تھے۔ اگرچہ ریلیز کے وقت فلم باکس آفس پر کامیاب ثابت نہیں ہوئی لیکن بعد میں اسے شائقین کے درمیان غیر معمولی مقبولیت حاصل ہوئی۔ اس کے گانے خصوصاً 'تو پھر آؤ' آج بھی بے حد پسند کیے جاتے ہیں اور مختلف مواقع پر سنے جاتے ہیں۔
پہلی فلم کی کہانی شیوَم پنڈت نامی ایک کرائے کے قاتل کے گرد گھومتی ہے جسے اپنے مالک کی محبوبہ پر نظر رکھنے کا کام دیا جاتا ہے۔ بعد میں اسے معلوم ہوتا ہے کہ وہ انسانی اسمگلنگ کا شکار ہے تو وہ اسے اس کے محبوب سے ملانے کا فیصلہ کرتا ہے۔
'آوارہ پن 2' دنیا بھر کے سینما گھروں میں 14 اگست 2026 کو ریلیز کی جائے گی۔
