آواز۔ دی وائس آسام بیورو

آسام میں سیلاب کی شدت اگرچہ پہلے کے مقابلے میں کچھ کم ہوئی ہے، لیکن ریاست کے کئی اضلاع اب بھی شدید متاثر ہیں۔ شیو ساگر، چارائی دیو، جورہاٹ، گولاگھاٹ اور ڈبروگڑھ سمیت متعدد علاقوں میں سیلاب نے بڑے پیمانے پر تباہی مچائی ہے۔ ماہرین کے مطابق 1950 کے تاریخی زلزلے کے بعد یہ آسام کی بدترین قدرتی آفات میں شمار کی جا رہی ہے۔

جنوبی آسام میں سیلاب کی سنگین صورتحال نے نہ صرف ملک بلکہ عالمی سطح پر بھی توجہ حاصل کی ہے۔ مختلف سماجی تنظیمیں، رضاکار ادارے، عوامی شخصیات اور فلمی ستارے متاثرین کی امداد کے لیے مسلسل آگے آ رہے ہیں۔بالی ووڈ کے سپر اسٹار سلمان خان نے بھی آسام کے سیلاب متاثرین کی مدد کا اعلان کیا ہے۔ وہ اپنی فلاحی تنظیم بیئنگ ہیومن اور آسام میں موجود اپنے مداحوں کے تعاون سے مرحلہ وار امدادی مہم شروع کر رہے ہیں۔

اس مہم کے پہلے مرحلے میں سیلاب زدہ علاقوں میں خوراک اور روزمرہ استعمال کی بنیادی اشیا تقسیم کی جائیں گی۔ دوسرے مرحلے میں متاثرہ خاندانوں کو ہنگامی راشن کٹس فراہم کی جائیں گی۔ تیسرے مرحلے میں بیئنگ ہیومن سیلاب سے متاثرہ علاقوں میں اسکولوں اور اسپتالوں کی تعمیر نو میں بھی تعاون کرے گی۔ اس مقصد کے لیے مقامی رضاکاروں اور مداحوں کی مدد سے امدادی سرگرمیوں کو تیز اور مؤثر بنایا جا رہا ہے۔

Update : Distribution of ration and hygiene kits has started in flood-affected areas. #SalmanKhan https://t.co/0JX8eKvs00 pic.twitter.com/b3P2JGYhSZ

— MASS (@Freak4Salman) July 28, 2026

بالی ووڈ اداکارہ عالیہ بھٹ نے بھی آسام کی صورتحال پر گہرے رنج کا اظہار کرتے ہوئے اپنے انسٹاگرام پر عوام سے امداد کی اپیل کی۔ انہوں نے لکھا کہ آسام اس وقت شدید آزمائش سے گزر رہا ہے۔ 60 سے زائد افراد جان کی بازی ہار چکے ہیں جبکہ لاکھوں لوگ بے گھر ہو گئے ہیں۔ بے شمار خاندان اپنے گھر، زمین، مویشی اور اپنے پیاروں سے محروم ہو چکے ہیں۔عالیہ بھٹ نے کہا کہ امدادی اداروں اور رضاکار تنظیموں کی ہر ممکن مالی اور عملی مدد کی جانی چاہیے تاکہ متاثرہ خاندانوں کو جلد از جلد سہارا مل سکے۔ جانوروں کے تحفظ کے لیے سرگرم رہنے والی عالیہ نے کازیرنگا نیشنل پارک سمیت دیگر محفوظ جنگلات میں جنگلی حیات کو پہنچنے والے نقصان پر بھی گہری تشویش ظاہر کی۔

معروف یوٹیوبر کیری میناتی نے بھی آسام کے متاثرین کی مدد کے لیے یوٹیوب پر خصوصی براہ راست نشریات کیں۔ اس دوران انہوں نے اپنے ناظرین کے تعاون سے 11 لاکھ روپے جمع کیے اور اپنی جانب سے مزید 2 لاکھ روپے شامل کرتے ہوئے مجموعی طور پر 13 لاکھ روپے قومی آفات سے نمٹنے والی فورس کو عطیہ کیے تاکہ یہ رقم سیلاب متاثرین کی امداد پر خرچ کی جا سکے۔کیری میناتی اس سے قبل 2022 میں آسام میں آنے والے تباہ کن سیلاب کے دوران بھی امدادی سرگرمیوں میں حصہ لے چکے ہیں۔ انہوں نے ملک کی دیگر قدرتی آفات کے دوران بھی مالی تعاون فراہم کیا ہے۔

اداکارہ بھومی پیڈنیکر نے بھی ایک ویڈیو پیغام جاری کرتے ہوئے کہا کہ لاکھوں افراد بے گھر ہو چکے ہیں، کئی جانیں ضائع ہو گئی ہیں اور پورے کے پورے گاؤں پانی میں ڈوب گئے ہیں۔انہوں نے کہا کہ آسام کو اس وقت پورے ملک کی یکجہتی اور تعاون کی ضرورت ہے۔ جس طرح گزشتہ برس پنجاب، جموں، بہار اور مہاراشٹر کے عوام نے قدرتی آفات کے دوران ایک دوسرے کا ساتھ دیا تھا، اسی جذبے کے ساتھ آسام کے عوام کی مدد کے لیے بھی آگے آنا چاہیے۔

بھومی نے عوام سے اپیل کی کہ وہ خوراک، کپڑوں، حفظان صحت کی اشیا اور امدادی سرگرمیوں کے لیے دل کھول کر عطیات دیں۔انہوں نے کہا کہ آسام میں تباہی کے مناظر انتہائی دل خراش ہیں۔ ہر صاحب استطاعت شخص کو چاہیے کہ وہ متاثرین کی مدد کرے اور اس پیغام کو زیادہ سے زیادہ لوگوں تک پہنچائے تاکہ امداد جلد از جلد ضرورت مندوں تک پہنچ سکے۔انہوں نے اپنی ویڈیو کے ساتھ لکھا کہ آسام شدید سیلاب کی زد میں ہے۔ آپ ہر مشکل وقت میں انسانیت کے ساتھ کھڑے رہے ہیں۔ اس بار بھی آسام کے لوگوں کا ساتھ دیجیے۔