شاہ عمران حسن،نئی دہلی
بڑوں کے لیے لکھنا آسان ہے مگر بچوں کے لیے لکھنا سب سے مشکل کام ہے، کیوں کہ اس میں بچوں کی نفسیات کو دھیان میں رکھ چیزیں لکھی جاتی ہیں۔تاہم شاہ تاج خان نے بچوں کے لیے کہانی لکھنے کا بیڑا اٹھایا ہے اور اس میں وہ کامیاب نظر آتی ہیں۔
شاہ تاج خان نے بچوں کے لیے ایک کتاب اردو زبان میں پکنک لکھی ہےجو بے حد مقبول ہوئی اور اب انہوں نے پھر سے بچوں کے لیے کہانیوں کی کتاب 'س سے سائنس' لکھی ہے۔ ریاست مہاراشٹر کے پونے سے تعلق رکھنے والی اردو زبان میں کہانیاں لکھنے والی بچوں کی مصنفہ اور صحافی شاہ تاج خان کی کی کتاب'س سے سائنس' کا اجرا ڈاکٹر اے پی جے عبدالکلام گشتی لائبریری وسئی(ممبئی) میں ہوا۔
خیال رہے کہ طلبہ و طالبات نے ہی کتاب'س سے سائنس' اجرا کیا۔ طلبہ میں سائنس سے دلچسپی پیدا کرنے اور سائنس جیسے خشک مضمون کو کہانی کے انداز میں پیش کر کے کم عمر طلبہ و طالبات کے لیے ایک اہم مواد فراہم کیا ہے۔
ابھی تک ان کی 'پکنک' کا خمار پوری طرح اترتا نہ تھا کہ مصنفہ نے 'س سے سائنس' کی تالیف کر کے ادبِ اطفال کی دنیا میں تہلکہ مچا دیا۔ شاہ تاج نے اپنی اس نئی تالیف کا اجرا بھی طلبہ کے ہاتھوں کرایا۔ ڈاکٹر اے پی جے عبدالکلام گشتی لائبریری وسئ کے طلبا کے ذریعے 'س سے سائنس' کا اجرا عمل میں آیا۔
انہوں نے اس موقع پر کہا کہ یہ طلبہ کے لیے لکھی کتاب ہے تو اس کا اجرا بھی طلبہ کے ذریعہ ہی ہونا چاہیے۔ اجرا کا عمل 18دسمبر2022 کی شام ڈاکٹر اے پی جے عبدالکلام گشتی لائبریری وسئ میں عمل میں آیا۔
خیال رہے کہ یہ لائبریری گذشتہ ایک سال سے جاری ہے۔ اس موقع پر بزم اردو ادب پال گھر کے ذمہ داران نعیم احمد ، سلیم عمرانی ، تنویر احمد اور آصف طاہر علی کے علاوہ لائبریری کے انچارج طالبِ علم منتظر شیخ و دیگر موجود تھے۔
طلبہ نے اس رسم میں بڑی جوش و خروش سے حصہ لیا کئی طلبہ نے موقع پر ہی کتاب پڑھنی شروع کردی اور اپنے تاثرات پیش کرتے ہوئے بتایا کہ اس کتاب کو پڑھنے میں انہیں بہت مزہ آرہا ہے۔ ضلع پریشد اردو اسکول وسئی کی طالبہ سامنہ نے بتایا کہ میں نے اس کتاب کے کچھ صفحات ابھی پڑھے جو انتہائی دلچسپ ہیں، اس کتاب کو پڑھنے کے بعد ہمیں سائنس پڑھنے میں بھی بہت مزہ آئے گا۔
ڈاکٹر اے پی جے عبدالکلام گشتی لائبریری وسئ کے انچارج منتظر شیخ نے بتایا کہ مصنفہ سائنس کو اتنے بہترین انداز میں سمجھاتی ہیں کہ طلبا میں سائنس سے خود بخوددلچسپی پیدا ہوجاتی ہے۔ سبکدوش معلمہ صبیحہ انصاری اور نعیم احمد سر نے 'س سے سائنس' کی ۳۵جلد خرید کر پال گھر کی مختلف گشتی لائبریری و اسکول کی لائبریری کو بطور ہدیہ بھجوانے کا انتظام کیا۔