نئی دہلی : جامعہ ملیہ اسلامیہ کے سینٹر فار کوچنگ اینڈ کیریئر پلاننگ کے تحت قائم ریزیڈنشل کوچنگ اکیڈمی کے وہ امیدوار جو یو پی ایس سی سول سروسز امتحان میں کامیاب ہوئے ہیں انہوں نے جامعہ کی انتظامیہ کے ساتھ ایک اہم نشست میں شرکت کی۔ یو جی سی اسکیم کے تحت چلنے والی اس اکیڈمی کے کامیاب امیدواروں کو یونیورسٹی قیادت کی جانب سے پرتپاک مبارکباد اور تہنیت پیش کی گئی۔

اس موقع پر جامعہ کے وائس چانسلر پروفیسر مظہر آصف جو آر سی اے کے چیف پیٹرن بھی ہیں اور رجسٹرار پروفیسر محمد مہتاب عالم رضوی بطور پیٹرن موجود تھے۔ اس کے علاوہ پروفیسر انچارج پروفیسر سمیعہ بانو اسسٹنٹ پروفیسر انچارج ڈاکٹر صبا ایم بشیر اکیڈمک لیڈ زما شیخ اور کوآرڈی نیٹر مدثر اعظمی سمیت آر سی اے کی ٹیم کے دیگر اراکین بھی اس موقع پر موجود تھے۔ اس نشست کے دوران کامیاب امیدواروں کو جامعہ قیادت سے گفتگو کرنے اور آر سی اے میں اپنے تعلیمی سفر کے تجربات بیان کرنے کا موقع ملا۔

وائس چانسلر پروفیسر مظہر آصف نے کامیاب امیدواروں کو مبارکباد دیتے ہوئے ان کی محنت نظم و ضبط اور تعلیمی سنجیدگی کی ستائش کی۔ انہوں نے منتخب امیدواروں کو نصیحت کی کہ وہ اپنی جڑوں سے جڑے رہیں اور جن لوگوں کی خدمت کے لیے وہ آگے بڑھ رہے ہیں ان کے مسائل کو سمجھتے ہوئے ایمانداری اور لگن کے اعلیٰ معیار کو برقرار رکھیں۔

رجسٹرار پروفیسر محمد مہتاب عالم رضوی نے بھی کامیاب امیدواروں کو مبارکباد پیش کی اور انہیں ترقی یافتہ اور خود کفیل ہندوستان کے وژن کے لیے اپنی خدمات وقف کرنے کی تلقین کی۔ انہوں نے اخلاقی قیادت کی اہمیت پر زور دیتے ہوئے کہا کہ طلبہ کو اپنے سفر میں آر سی اے اور جامعہ ملیہ اسلامیہ کے کردار کو ہمیشہ یاد رکھنا چاہیے اور اپنی مادر علمی کے لیے خدمات انجام دینے کی روایت کو آگے بڑھانا چاہیے۔

اس موقع پر جامعہ کے متعدد سینئر عہدیداران بھی موجود تھے جن میں انتظامیہ کے ارکان کنٹرولر امتحانات کے دفتر کے نمائندے فنانس آفیسر کے دفتر کے افسران مختلف فیکلٹیوں کے ڈینز ہاسٹل پرووسٹس اکیڈمک کونسلرز اور دیگر ذمہ داران شامل تھے۔ انہوں نے منتخب امیدواروں کو مبارکباد پیش کی اور ان کے روشن مستقبل کے لیے نیک تمناؤں کا اظہار کیا۔

نشست کے دوران کامیاب امیدواروں نے آر سی اے جامعہ ملیہ اسلامیہ میں اپنی تیاری کے تجربات اور انٹرویو کے مراحل کے بارے میں بھی گفتگو کی۔ انہوں نے جامعہ انتظامیہ کا شکریہ ادا کیا اور کہا کہ آر سی اے نے ان کی کامیابی میں اہم کردار ادا کیا۔ انہوں نے سول سروسز کی تیاری کرنے والے دیگر طلبہ کے لیے مسلسل محنت توجہ استقامت اور خود اعتمادی کو کامیابی کی کنجی قرار دیا اور ضرورت پڑنے پر اپنی رہنمائی فراہم کرنے کا یقین دلایا۔

جامعہ ملیہ اسلامیہ کی ریزیڈنشل کوچنگ اکیڈمی مسلسل مختلف اور پسماندہ طبقات کے طلبہ کو سول سروسز امتحان کی تیاری کے لیے معیاری رہنمائی سرپرستی اور تعلیمی وسائل فراہم کر رہی ہے۔ یہ نشست اس عزم کے ساتھ اختتام پذیر ہوئی کہ عوامی خدمات میں دیانت مساوات اور اعلیٰ معیار کی اقدار کو برقرار رکھا جائے اور ملک کی ترقی میں مثبت کردار ادا کیا جائے۔