شیخ محمد یونس : حیدرآباد

جب حوصلہ بنا لیا اونچی اڑان کا

پھر دیکھنا فضول ہے قد آسمان کا

جب وزیراعظم نریندر مودی نے سال 2019 میں 17ویں لوک سبھا کی اپنی پہلی تقریر کے دوران اردو زبان کا ایک شعر سنایا تھا ہر کسی کوبے چینی ہوگئی تھی کہ آخر وہ کون ہے جس کا شعر مودی کی زبان پر آیا۔کچھ دیر میں ایک نام سامنے آیا جو ساگر ترپاٹھی کا تھا۔ ممبئی کے ایک حسینی برہمن کی اردو شاعری اور نعت خوانی میں اونچی اڑان تھی جس نے انہیں ملک کے ایوان میں وزیر اعظم مودی کے لبوں تک پہنچا دیا تھا ۔اہل وطن کے لیے ان کا نام جانا پہچانا تھا کیونکہ ان کی نعتیہ کلام پہلے ہی مقبول تھے۔اب ایک بار پھر وہ سرخیوں میں ہیں -فرقہ وارانہ ہم آہنگی اور ہندو۔ مسلم اتحاد کے علمبردار مشہور ومعروف شاعر جناب ڈاکٹر پنڈت ساگر ترپاٹھی کو ان کی گراں قدر اور قابل احترام خدمات کے اعتراف میں رحمت عالم انٹرنیشنل پیس ایوارڈ 2023 عطا کیا گیا

جب وزیراعظم نریندر مودی نے پارلیمنٹ میں پنڈت ساگر ترپاٹھی کا شعر سنایا تھا، جنہیں اب حیدرآباد میں رحمت عالم انٹرنیشنل ایوارڈ سے نوازا گیا ہے جنہیں نعت خوانی
سے شہرت ملی ہے#PanditSagarTripathi #PMModi #RehmatAlamInternationalAward pic.twitter.com/dk6RTATooO

— Awaz-The Voice اردو (@AwazTheVoiceUrd) October 3, 2023

ساگر ترپاٹھی عالمی سطح پر شہرت کے حامل ہیں ۔وہ حسینی برہمن ہیں۔ ساگر ترپاٹھی کا نعتیہ مجموعہ کلام "سائبان رحمت" محسن انسانیت حضرت محمد مصطفی صلی اللہ علیہ وسلم سے ان کی والہانہ محبت اور عقیدت کا اظہار ہے. ان کی شاعری لاجواب ہے ۔وہ متعدد عرب ممالک کے علاوہ دنیا کے کونے کونے میں نعتیہ کلام پیش کرنے کی سعادت حاصل کر چکے ہیں ۔ان کا انداز بیاں کافی متاثر کن ہے۔ جب وہ بات کرتے ہیں تو ان کی گفتگو دلوں پر اثر کرتی ہے۔ اردو زبان میں فصاحت و بلاغت ان کا طرہ امتیاز ہے۔

                                                                                                                                                                                                                                      کل ہند بزم رحمت عالم ایک غیر سیاسی تنظیم ہے جس کا منشاء و مقصد انسانیت کی خدمت اور صالح معاشرہ کی تشکیل کو یقینی بنانا ہے۔بزم کے زیر اہتمام ہر سال عید میلاد النبیۖ کے موقع پر جشن منعقد کیا جاتا ہے اور رحمت عالم انٹرنیشنل پیس ایوارڈ عطا کیا جاتا ہے۔ہندو۔مسلم اتحاد کے امین ' فرقہ وارانہ ہم آہنگی کے نقیب اور انسانیت کی خدمت کیلئے وقف مشہور و معروف غیر مسلم شخصیات کو پیس ایوارڈ عطا کیا جاتا ہے۔بزم کی جانب سے گزشتہ میں پروفیسر کانچا ایلیا' کیپٹن پانڈو رنگا رائو' راجیو شرما(ماڑواڑی زبان میں قرآن مجید کے مترجم)' فادر سامیول پیٹراور مشہور رائٹر رام پنیانی اور ماہر خطاط انیل کمار چوہان کو ایوارڈپیش کیا گیا ۔رواں سال رحمت عالم پیس ایوارڈ پنڈت ساگر ترپاٹھی کو دیا گیا۔              رحمت عالم انٹرنیشنل پیس ایوارڈ                                                                                                                                                                                                                                                            کل ہند بزم رحمت عالم کی جانب سے جشن میلاد النبیۖ کا خواجہ منشن مانصاحب ٹینک پر تزک و احتشام کے ساتھ انعقاد عمل میں آ یا۔تقریب میں مشہور و معروف علما مولانا متین علی شاہ قادری ،مفتی صلاح الدین اور صدرنشین بزم ایم اے مجیب سینئر ایڈوکیٹ ہائی کورٹ کے ہاتھوں ساگر ترپاٹھی کو ایوارڈ عطا کیا گیا اور ان کی خدمات کی ستائش کی گئی۔ 

خاندانی پس منظر                                                                                                                                                                                                                                       پنڈت ساگر ترپاٹھی اعلی تعلیم یافتہ اور غیر معمولی شہرت کے حامل خاندان کے چشم و چراغ ہیں۔ وہ سلطان پور اتر پردیش میں پیدا ہوئے۔ ان کے والد کا نام پنڈت پرتھوی پال ترپاٹھی اور والدہ کا نام کملا دیوی ہے۔ساگر ترپاٹھی کی اعلی تعلیم الہ آباد  یونیورسٹی میں ہوئی۔ ان کی شریک حیات محترمہ کانتا رام ساگر تر پاٹھی اردن سے تعلق رکھتی ہیں اور عربی زبان میں زبردست مہارت رکھتی ہیں۔ ساگر ترپاٹھی کو ایک لڑکا اور ایک لڑکی ہے ۔ممبئی کے ساکن 73 سالہ ساگر ترپاٹھی پرتھوی  گروپ آف کمپنیز کے صدر نشین اور ورلڈ صوفی کونسل کے نائب صدر نشین ہیں۔ 

    اردو زبان سے محبت کی داستان                                                                                                                                                                                                                                                           ساگر ترپاٹھی کے دادا جناب پنڈت سبھاپتی تیواری (ترپاٹھی)، فراق گورکھپوری کے والد کے رفیق خاص تھے۔ پنڈت سبھاپتی تیواری نے اپنے نبیرہ ساگر ترپاٹھی کو انگریزی زبان کی تعلیم و تربیت کے لئے فراق گورکھپوری کے پاس روانہ کیا۔ فراق گورکھپوری انگریزی زبان میں غیر معمولی مہارت کے حامل تھے ۔ساگر ترپاٹھی کا منشا و مقصد انگریزی زبان میں عبور حاصل کرنا تھا تاہم فراق گورکھپوری سے تعلیم وہ تربیت کے دوران وہ اردو زبان سے بے انتہا متاثر ہوئے۔ اردو زبان کی حلاوت اور چاشنی ساگر ترپاٹھی کے دل میں گھر کر گئی۔ فراق گورکھپوری کی شخصیت نے ساگر ترپاٹھی کو بہت زیادہ متاثر کیا۔ پھر کیا تھا کہ ساگر ترپاٹھی اردو زبان پر عبور حاصل کرنے لگے۔ انہوں نے بازار سے لغت خریدی اور اردو زبان کے فصیح الفاظ کا استعمال کرتے ہوئے اپنے دوستوں کو متاثر کرنے لگے ۔رفتہ رفتہ اردو سے ان کی محبت مزید گہری ہوتی گئی اور وہ اشعار کہنے لگے۔

 شاعری کی ابتدا ء                                                                                                                                                                                                                                                                               ساگر ترپاٹھی کی شاعری میں گہرائی اور گیرائی کا عنصر نمایاں پایا جاتا ہے۔ یوں تو وہ کئی کتب کے مصنف ہیں تاہم ان کی غیر معمولی خداداد صلاحیتوں کا اعتراف ان کے پہلے شعرسے لگایا جاسکتا ہے

جس کے نشتر کا وار تھا گہرا

وہ بھی کم بخت یار تھاگہرا

ساگر ترپاٹھی بے ساختہ اشعار کہتے ہیں۔ وہ مشاعروں میں قدر وہ منزلت کی نگاہ سے دیکھے جاتے ہیں ۔کوئی بھی شخص جو ان سے بات کرتا ہے تو وہ متاثر ہوئے بغیر نہیں رہ سکتا ۔ان کی شخصیت میں ایک کشش ہے جو انہیں دیگر شاعروں سے منفرد اورممتاز بناتی ہے۔

نعتیہ شاعری کی طرف رغبت

ساگر ترپاٹھی نے جب کنورمہندر سنگھ بیدی سحر کا شعر

 عشق ہو جائے کسی سے کوئی چارہ تو نہیں

صرف مسلم کا محمد پہ اجارہ تو نہیں                                                                                                                                                                                                                                                     سنا تو کافی متاثر ہوئے اور وہ بھی نعتیہ کلام کہنے لگے۔ ساگر ترپاٹھی نے بتایا کہ انہیں حضور اکرم صلی اللہ علیہ وسلم سے بے پناہ محبت اور عقیدت ہے۔ انہوں نے بتایا کہ پاکیزگی اور روحانیت کے اعلی درجے پر فائز ہوئے بغیر نعتیہ کلام کہنا ممکن نہیں ہے وہ باوضو ہو کر نعتیہ کلام کہتے ہیں۔  

      ہزاروں اشعار اور سینکڑوں ایوارڈس                                                                                                                                                                                                                                             ساگر ترپاٹھی، شاعری کے میدان میں عظیم الشان ریکارڈ کے حامل ہیں۔ ان کی زندگی شاعری سے عبارت ہے۔ ان کے اشعار کی تعداد لگ بھگ 85 ہزار ہے۔ انہیں تقریبا1700 ایوارڈس حاصل ہو چکے ہیں جن سے ان کی شخصیت کا بخوبی اندازہ لگایا جا سکتا ہے ۔وہ درجنوں ممالک کا دورہ کر چکے ہیں۔ ان کی لائبریری میں ہزاروں کتب موجود ہیں۔ وہ ہمیشہ مصروف عمل رہتے ہیں ۔

ساگر ترپاٹھی کے شعر کی پارلیمنٹ میں گونج                                                                                                                                                                                                                                         ساگر ترپاٹھی کی شاعری نے ہر خاص و عام کو متاثر کیا ہے۔ وزیراعظم نریندر مودی نے سال 2019 میں 17ویں لوک سبھا کی اپنی پہلی تقریر کے دوران اردو زبان کا ایک شعر پیش کیا جو کہ ساگر ترپاٹھی کے قلم کا شاہکار ہے۔

 جب حوصلہ بنا لیا اونچی اڑان کا

پھر دیکھنا فضول ہے قد آسمان کا

ساگر ترپاٹھی نے نمائند آواز دی وائس سے بات کرتے ہوئے کہا کہ انہیں کئی ایوارڈس حاصل ہو چکے ہیں تاہم وہ رحمت عالم پیس ایوارڈ کو اپنی زندگی کا حاصل متصور کرتے ہیں۔ انہوں نے رحمت عالم پیس ایوارڈ کے حصول پر خوشی و مسرت اور فخر کا اظہار کیا ۔انہوں نے کہا کہ یہ ایوارڈ ان کے لئے انتہائی بیش بہا اور قیمتی ہے جسے وہ الفاظ میں بیان نہیں کر سکتے۔ ساگر ترپاٹھی نے کہا کہ مذہب اسلام امن کا علمبردار ہے اور ایک غیر مسلم کا رحمت عالم پیس ایوارڈ کے لئے انتخاب اس بات کی دلیل ہے۔ایک سوال پر کہ اردو زبان سے کیا ان کے بچوں کو بھی لگاؤ ہے،ساگر ترپاٹھی نے بے ساختہ کہا ۔

 مرید ہم ہی اکیلے نہیں ہیں اردو کے

 ہماری بیٹی بھی اردو زبان بولتی ہے

 ساگر ترپاٹھی نے نوجوان نسل کو پیغام دیا کہ وہ محبتوں کو بانٹیں۔ معاشرے میں نفرت کے لیے کوئی جگہ نہیں ہونی چاہیئے ۔