Story by اے این آئی | Posted by Aamnah Farooque | Date 09-11-2025
وہ چہرے جو دہلی کے تبدیلی سازبنے
آواز – دی وائس بیورو، نئی دہلی
دہلی ہمیشہ سے باصلاحیت اور ہنرمند لوگوں کا شہر رہا ہے۔ ان میں سے اکثر چھوٹے شہروں اور قصبوں سے ہجرت کر کے یہاں آئے، اور کئی نے یہاں آ کر اپنے کیریئر، کاروبار اور پیشوں میں بڑی کامیابیاں حاصل کیں۔ مگر ان میں سے کچھ ایسے بھی ہیں جنہوں نے ذاتی کامیابی کی سرحدوں سے آگے بڑھ کر معاشرے کو بہتر بنانے میں اپنا کردار ادا کیا۔ یہ وہ رہنما اور جدت پسند شخصیات ہیں جنہوں نے دوسروں کے لیے مثال قائم کی۔ اسی جذبے کو سراہتے ہوئے، "دہلی چینج میکرز" سیریز میں ہم دہلی کی ایسی دس نمایاں شخصیات کو پیش کر رہے ہیں جن کا کام انہیں واقعی غیر معمولی بناتا ہے۔
۔1. سراج الدین قریشی
ایک معروف صنعتکار، جنہوں نے گوشت اور فوڈ پروسیسنگ انڈسٹری کے صنعت کو جدید بنایا۔ وہ دہلی کے انڈیا اسلامک کلچرل سینٹر کے بانیوں میں سے ایک ہیں۔ سراج الدین قریشی نے اپنے ہند گروپ کے تحت ہندوستان میں پہلا جدید ذبیحہ خانہ قائم کیا اور اپنے فوڈ بزنس کو 50 ممالک تک پھیلایا۔ ان کی سب سے بڑی سماجی خدمات میں سے ایک ہے اپنی برادری، قریشی طبقے میں تعلیم اور خواتین کے فروغ کی مہم۔ انہوں نے لوگوں کو سادہ شادیوں، بچیوں کی تعلیم اور مختلف پیشوں میں جانے کی ترغیب دی۔ آج ان کی کوششوں سے قریشی برادری میں صرف 20 فیصد مرد گوشت کی تجارت سے وابستہ ہیں، جبکہ خواتین کی تعلیمی سطح نمایاں طور پر بہتر ہوئی ہے۔
۔2. عذرا نقوی
عذرا نقوی اردو زبان کی دیوانی ہیں ۔ وہی زبان جس میں وہ سوچتی اور جیتی ہیں۔ مختلف ممالک میں قیام اور کئی پیشوں میں کام کرنے کے باوجود، ان کا دل ہمیشہ اردو کے لیے دھڑکتا رہا۔ ریختا فاؤنڈیشن میں کنسلٹنگ ایڈیٹر کے طور پر شامل ہو کر انہوں نے اپنے شوق کو نیا رنگ دیا۔ انہوں نے واٹس ایپ پر بین الاقوامی نسائی ادبی تنظیم (بنت) قائم کی۔ اب تک بنت نے واٹس ایپ پر ہونے والی گفتگو پر مبنی دو مجموعے شائع کیے ہیں، اور تیسرا زیرِ ترتیب ہے۔ عذرا کا کہنا ہے کہ ہمارے گروپ میں صرف ادب پر گفتگو ہوتی ہے ۔ مذہب یا غیر متعلقہ باتوں پر نہیں۔
۔3. شیراز خان
شیراز خان کا نعرہ ہے “یس وی کین” ایک عزم کہ اتحاد اور موقع کسی بھی زندگی کو بدل سکتا ہے۔ پرانے دہلی سے تعلق رکھنے والے شیراز خان نے اپنی این جی او ‘یس وی کین’ کے ذریعے نوجوانوں کی تربیت، کمیونٹی بیداری، اور سماجی ترقی کے لیے پلیٹ فارم مہیا کیا۔ یہ تنظیم 2015 میں قائم ہوئی، اور کورونا وبا کے دوران شیراز اور ان کے ساتھی نندیش نے محسوس کیا کہ لوگوں کو مالی مدد سے بڑھ کر رہنمائی، حوصلے اور کمیونٹی سپورٹ کی ضرورت ہے۔ آج ‘یس وی کین’ نوجوانوں کی قیادت میں سماجی بیداری کی تحریک بن چکی ہے، جو انحصار نہیں بلکہ حوصلہ اور خودمختاری پیدا کرتی ہے۔
۔4. سحر ہاشمی
ہندوستان میں ذہنی صحت پر بات کرنا اب بھی ایک معاشرتی ممنوعہ سمجھا جاتا ہے۔ اسی خاموشی کو توڑنے کے لیے دہلی کی 29 سالہ سحر ہاشمی نے مثال قائم کی۔ وہ خود ڈپریشن اور بارڈر لائن پرسنالٹی ڈس آرڈر سے گزر چکی ہیں، مگر اب وہ دوسروں کے لیے امید کی کرن بن چکی ہیں۔ اپریل 2025 میں انہوں نے مہم “بریکنگ اسٹیگما : ون مائل ایٹ آ ٹائم ” شروع کی، جس کے تحت وہ 2779 کلومیٹر بائیک رائیڈ پر دہلی سے کشمیر تک گئیں۔ یہ صرف ایک جسمانی سفر نہیں تھا بلکہ ذہنی صحت کے گرد پھیلے ہوئے معاشرتی خاموشی کے خلاف ایک علامتی جدوجہد تھی۔
۔5. اصغر علی
دہلی کے مصور اصغر علی نے اپنی پینٹنگز کے ذریعے گنگا جمنی تہذیب کو فروغ دینے کا بیڑا اٹھایا ہے۔ ایک مسلمان ہونے کے باوجود، ان کے 50 سے زائد فن پارے بھگوان شری کرشن کی زندگی پر مبنی ہیں۔ وہ کہتے ہیں کہ انہیں بچپن سے ہی شری کرشن کے مور پنکھ اور بانسری نے متاثر کیا۔ ان کا فن کرشن کے بچپن، جوانی اور مہابھارت کی جنگ کو بڑی باریکی سے پیش کرتا ہے۔ان کی پینٹنگز کو حال ہی میں کرکشیتر کے بین الاقوامی گیتا مہوتسو میں خوب سراہا گیا۔
۔6. ڈاکٹر آمنہ مرزا
دہلی یونیورسٹی کی پالیٹیکل سائنس کی پروفیسر ڈاکٹر آمنہ مرزا اپنی تدریس کے منفرد انداز کے لیے جانی جاتی ہیں۔ وہ کلاس روم کے بجائے دہلی کے تاریخی مقامات پر لیکچر دینا پسند کرتی ہیں تاکہ تعلیم اور ورثہ ایک دوسرے سے جڑ سکیں۔ وہ ایک اساتذہ، سماجی کارکن، ثقافتی محافظ ہیں، جن کا یقین ہے کہ قوم کی روح کو اس کے لوگوں اور تنوع کے ذریعے مضبوط کیا جا سکتا ہے۔
۔7. محمد معراج رئین
محمد معراج رئین نے ہندوستان کے پسماندہ مسلمانوں جو کل مسلم آبادی کا تقریباً 80 فیصد ہیں ۔ ان کے حالات بہتر بنانے کا عزم کیا ہے۔ انہوں نے پسماندہ وکاس فاؤنڈیشن قائم کی جو تعلیم، صحت، معاشی خودمختاری اور سماجی انصاف کے میدان میں کام کر رہی ہے۔ معراج رئین کا ماننا ہے کہ سیاست ہر مسئلے کا حل نہیں، اصل ترقی بیداری اور تعاون سے ممکن ہے۔ ان کی تنظیم عملی اقدامات کے ذریعے کمیونٹی میں اعتماد، تعلیم اور روزگار کے مواقع پیدا کر رہی ہے۔
۔8. اویس علی خان
ایک کامیاب چارٹرڈ اکاؤنٹنٹ اویس علی خان نے اپنی مستحکم نوکری چھوڑ کر لکشمی نگر، دہلی میں ایک چھوٹے اپارٹمنٹ سے اپنا کاروبار شروع کیا۔ دوستوں اور بینکوں سے قرض لے کر انہوں نے صرف کمپنی نہیں بنائی بلکہ تبدیلی کا پلیٹ فارم بنایا۔ان کا ماننا ہے کہ اگر کسی شخص کو بنیادی ہنر سکھا دیا جائے، تو وہ نہ صرف روزگار حاصل کر سکتا ہے بلکہ ایک پوری نسل کی زندگی بدل سکتا ہے۔
۔9. ادیبہ علی
صرف 17 سالہ ادیبہ علی ہمت اور حوصلے کی علامت ہیں۔ نظام الدین میں اپنے گھر کی بالکنی سے گرنے کے بعد وہ جسمانی معذوری کا شکار ہوئیں، مگر اس چوٹ نے انہیں توڑا نہیں بلکہ نئی پہچان دی۔ سال 2023 میں بھارت کی 26ویں نیشنل شوٹنگ چیمپئن شپ (بھوپال) میں انہوں نے دو میڈل جیت کر سب کو حیران کر دیا۔ادیبہ کی کہانی صرف کامیابی کی نہیں، بلکہ حوصلے، عزم اور خود اعتمادی کی داستان ہے۔
۔10. سید ساحل آغا
قصہ گوئی ہمیشہ سے صوفیاء اور خانقاہوں سے منسلک رہی ہے ۔ یہ محبت، اتحاد اور ہم آہنگی کا پیغام دینے والا فن ہے۔ سید ساحل آغا نے اس قدیم روایت کو جدید انداز میں زندہ کیا ہے۔ آج وہ ہندوستان اور بیرون ملک کہانی سنانے والے سب سے معروف فنکاروں میں شمار ہوتے ہیں۔ان کا کہنا ہے کہ میں نے محسوس کیا کہ لوگ پڑھنے سے زیادہ سننا پسند کرتے ہیں، اس لیے کہانیوں کو سنانے کے انداز میں پیش کیا جانا چاہیے تاکہ لوگ ماضی کو سمجھ سکیں اور اس سے سیکھ سکیں۔ ساحل آغا کا مقصد صرف کہانیاں سنانا نہیں بلکہ ہندوستانی تہذیب و ثقافت کو فروغ دینا ہے۔
