نئی دہلی

ہندوستانی شیئر بازار ہفتے کے آخری کاروباری دن منفی رجحان کے ساتھ کھلا۔ دونوں بڑے اشاریے سینسیکس اور نفٹی گراوٹ کے ساتھ کھلے۔ ابتدائی کاروبار میں سینسیکس 330 پوائنٹس گر کر 77,334 پر آ گیا، جبکہ نفٹی 93.3 پوائنٹس کی کمی کے ساتھ 24,079.75 پر پہنچ گیا۔ تیل کی بڑھتی قیمتوں اور غیر ملکی سرمایہ کے مسلسل انخلا کے باعث سرمایہ کاروں میں بے چینی دیکھی گئی۔ آئی ٹی شیئرز میں کمزوری اور عالمی بازاروں میں منفی رجحان نے بھی سرمایہ کاروں کے حوصلے کو متاثر کیا۔

سینسیکس کی 30 کمپنیوں کی صورتحال

سینسیکس کی 30 کمپنیوں میں سے ایچ سی ایل ٹیکنالوجیز، انفوسس، ٹاٹا کنسلٹنسی سروسز، سن فارماسیوٹیکل انڈسٹریز، ٹیک مہندرا اور بھارتی ایئرٹیل کے شیئرز میں سب سے زیادہ گراوٹ درج کی گئی۔وہیں الٹراٹیک سیمنٹ، مہندرا اینڈ مہندرا، اسٹیٹ بینک آف انڈیا اور ہندوستان یونی لیور کے شیئرز میں اضافہ دیکھا گیا۔عالمی تیل کے بینچ مارک برینٹ کروڈ میں 0.89 فیصد اضافہ ہوا اور یہ 106 ڈالر فی بیرل پر ٹریڈ کر رہا تھا۔ ایکسچینج کے اعداد و شمار کے مطابق غیر ملکی ادارہ جاتی سرمایہ کاروں نے جمعرات کو 3,254.71 کروڑ روپے کے شیئرز فروخت کیے۔

ایشیائی بازار

جمعہ کی صبح ایشیائی بازاروں میں ملا جلا رجحان دیکھا گیا، کیونکہ اسرائیل اور لبنان کے درمیان جنگ بندی میں تین ہفتوں کی توسیع کے باوجود سرمایہ کار محتاط رہے۔ جاپان کا نکئی 225 انڈیکس 0.71 فیصد بڑھا جبکہ ٹوپکس 0.30 فیصد اوپر رہا۔ جنوبی کوریا کا کوسپی 0.23 فیصد گرا، جبکہ چھوٹے حصص کا کوسڈیک تقریباً مستحکم رہا۔ ہانگ کانگ کا ہینگ سینگ انڈیکس فیوچرز 25,802 پر تھا، جو اس کے گزشتہ بند 25,915.2 سے کم ہے۔

امریکی بازار

سرمایہ کاروں کے محتاط رویے کے باعث امریکی بازار جمعرات کو گراوٹ کے ساتھ بند ہوئے۔ S&P 500 میں 0.41 فیصد کمی آئی اور یہ 7,108.40 پر بند ہوا۔ ٹیکنالوجی شیئرز پر مشتمل نیسڈیک کمپوزٹ 0.89 فیصد گر کر 24,438.50 پر بند ہوا۔ جبکہ ڈاؤ جونز انڈسٹریل ایوریج 179.71 پوائنٹس کی گراوٹ کے ساتھ 49,310.32 پر بند ہوا۔

جمعرات کو سینسیکس 852.49 پوائنٹس یعنی 1.09 فیصد گر کر 77,664 پر بند ہوا، جبکہ نفٹی 205.05 پوائنٹس یعنی 0.84 فیصد کمی کے ساتھ 24,173.05 پر بند ہوا۔