غازی آباد
ملک میں کورونا کی وبا کے بےقابو ہونے کے بعد جہاں ایک طرف نظام میں موجود خرابیاں اور انتظامیہ کی نا اہلی کھل کر سامنے آئی وہیں دوسری جانب ملک کے باشندوں میں موجود باہمی اتحاد کا جذبہ بھی سب کے سامنے آ گیا ۔ وبا نے ویسے تو لاکھوں زندگیاں نگل لیں لیکن ان ناگہانی آفت کے نازل ہونے کے بعد مذہب اور ذات پات میں بکھری ہندوستانی قوم سیسہ پلائی دیوار بن کر سامنے آئی اور اپنی مدد آپ کے تحت وبا کا بڑی دلیری سے مقابلہ کیا ۔
ایسی ہی ایک مثال غازی آباد کے لونی میں دیکھنے کو ملی جہاں انسانیت کی دل جیتنے والی تصویر سامنے آئی ہے۔ لونی میں ایک ہندو عورت کی موت کے بعد ، جب جنازے میں 4 افراد بھی شریک نہیں تھے تو مسلم نوجوانوں نے ہندو رسم و رواج کے مطابق اس خاتون کی آخری رسومات ادا کیں ۔ ایسی اور اس جیسی نہ جانے کتنی مثالیں ہیں جسے چشم فلک نے اس کورونا دور میں دیکھا ۔ امید ہے کہ باہمی ایثار کا یہ جذبہ یوں ہی بنا رہے اور ملک میں ہم آہنگی کے نیے دور کا آغاز ہو ۔