کوئٹہ : پاکستان میں حکومت خواہ کسی بھی سیاسی جماعت کی ہو مگر اس کا بلوچستان کے ساتھ سوتیلانہ سلوک تقریبا یکساں ہوتا ہے۔ حق کی آواز کو دبانے پر توجہ ہوتی ہے اور بلوچی باشندوں کے حقوق دینے سے آنا کانی کے ساتھ مظالم کا دور ہمیشہ جاری رہتا ہے۔ اس وقت بھی یہی حال ہے۔ بلوچستان کے عوام کئی ماہ سے سڑکوں پر ہیں اور اپنے حق کے لیے آواز بلند کررہے ہیں لیکن ان کی آواز سننے کے بجائے ان کی آواز کو دبانے کا کام جاری ہے۔

 گوادر میں بلوچی عوام کی جنگ لڑ رہے مولانا ہدایت الرحمٰن  پر بھی مظالم کے پہاڑ توڑے گئے۔ جنہیں حال ہی میں گوادر کی لاک اپ کی قید سے رہائی ملی ہے۔ وہ کہتے ہیں کہ میں چار مہینے جیل میں تھا، اس دوران پولیس کی جانب سے کبھی ملاقات پر پابندی اور کبھی کسی اور حیلے سے مجھے ذہنی اذیت دینے کی کوشش کی گئی۔

’26 دسمبر 2022 کو ہمارے پرامن احتجاج پر آپریشن کیا گیا۔ ہمارے جائز مطالبات تھے۔ آئین اور قانون کے تحت تھے۔ ہمارے احتجاج پرحملہ کر کے سینکڑوں قائدین پر مقدمات قائم کیے گئے۔ 26 دسمبر 2022 سے لے کر آج تک ہمارے ساتھی قید میں ہیں۔ ماجد جوہر جو وائس چیئرمین میونسپل کمیٹی ہیں کرائم برانچ کوئٹہ میں قید ہیں۔‘