آوازدی وائس
کورونا احتیاطوں پر عمل درآمد کرتے ہوئے عازمین حج کے قافلے مکہ پہنچنا شروع ہوگئے ہیں اور آج سے مناسک حج کا آغاز ہو جائے گا اس سلسلے میں مکہ سے باہر سے آنے والے عازمین حج نے مسجد الحرام پہنچ کر طواف القدوم کی سنت ادا کی۔
مکہ میں عازمین حج کے استقبال کیا جارہا ہے۔جس کے لئے خصوصی انتظامات کئے گئے ہیں۔ آج سنیچر کی صبح فجر کے بعد چھ بجے سے عازمین حج کا استقبال شروع ہوا جو دو روز تک جاری رہے گا۔
چار مقامات پر عازمین کے 10 گروپوں کا استقبال کیا گیا۔ ہر گروپ میں تقریبا تین ہزارعازمین ہیں۔ٰ
حج و عمرہ اسپیشل فورس کے کمانڈر میجر جنرل محمد البسامی کا کہنا تھا کہ ’اس وقت تمام ضروری امورانجام دئیے جاچکے ہیں۔ انہوں نے کہا کہ ’یہ بات ریکارڈ پر آئی ہے کہ بعض عازمین براہ راست مسجد الحرام مکہ مکرمہ جانا چاہتے ہیں۔
یہ حج آپریشن کے مقررہ انتظام کے خلاف ہے۔ کوئی بھی عازم حج براہ راست مسجد الحرام جانے کی کوشش نہ کرے۔میجر جنرل محمد البسامی نے کہا کہ ’مسجد الحرام مکہ مکرمہ حاضری کے حوالے سےعازمین کے قافلوں کا شیڈول تیار کیا جارہا ہے۔
مطاف کے صحن، حرم مکی کی زمینی اور پہلی منزل کی گنجائش محدود ہے۔ یہ اور اس جیسے تمام مسائل حل کرنے کے لیے ہمارے پاس واحد اختیارعازمین کی قافلہ بندی اور سارے حج عمل کو منظم کرنے کے سوا اور کچھ نہیں۔‘ علاوۃ ازیں وزارت اسلامی امور و دعوت و رہنمائی نے اس سال عازمین کو حج کے طریقہ کار سے آگاہ کرنے کے لیے 30 لاکھ ایس ایم ایس بھیجنے کی تیاریاں کی ہیں۔
مجموعی طورپر 33 لاکھ 20 ہزار 706 ایس ایم ایس بھیجے جائیں گے جو حج احکام پر مشتمل ہوں گے۔ سبق ویب سائٹ کے مطابق وزارت اسلامی امور ’حج امن و سلامتی کے ساتھ‘ کے عنوان سے آگہی مہم چلا رہی ہے۔
مسجد الحرام کی سینیٹائزنگ
سعودی عرب میں مقدس مساجد کی انتظامیہ نے کہا ہے مسجد الحرام میں وائرس کا پھیلاؤ روکنے کے لیے احتیاطی اقدامات کیے گئے ہیں۔
مسجد الحرام میں جراثیم کش دواوں کا استعمال ہورہا ہے
چھتوں، فرش اور پورے ماحول کو سینیٹائز کرنے کے لیے 450 سے زیادہ سینیٹائزنگ پمپ اور 30 سے زیادہ مشینوں کا انتظام ہے۔ مسجد الحرام کے ایک، ایک حصے کو سینیٹائز کرنے میں روزانہ پندرہ ہزار لٹر سے زیادہ جراثیم کش مادہ استعمال کیا جارہا ہے۔
مسجد الحرام کے تمام دروازوں پر 70 سے زیادہ تھرمل کیمرے لگائے گئے ہیں۔ ٹیسٹنگ کے دوران سماجی فاصلہ برقرار رکھنے کے لیے ماہرین نے مسجد الحرام کے ہر حصے میں ٹریک بنائے ہیں۔ تھرمل کیمرے ایک سیکنڈ میں 6 سے 8 افراد کو چیک کر سکتے ہیں۔
تین ہزار الیکٹرانک چیئر اور 5 ہزار ویل چیئر کا انتظام کیا گیا ہے۔ ویل چیئر کی بکنگ ایپ کے ذریعے کی جا سکتی ہے یا صفا پر موجود کاؤنٹر سے براہ راست چیئر حاصل کی جا سکتی ہے۔
عازمیان حج کی آمد کا سلسلہ شروع
مسجد الحرام میں زائرین کو سہولتیں فراہم کرنے پر مامور ادارے کے معاون ڈائریکٹر فہد الجعید نے بتایا کہ روزانہ چار بار قالین کی صفائی کا پروگرام ہے تاکہ زائرین ہر طرح کے وائرس سے محفوظ رہیں۔ مسجد الحرام میں نماز کے لیے مختص مقامات پر بچھے ہوئے 13500 قالینوں کو روزانہ اٹھایا جاتا ہے انہیں دھونے اور سینیٹائزنگ کا اہتمام کیا جاتا ہے۔
مسجد الحرام میں ’پلاسٹک والے فرش‘ کی صفائی اور سینیٹائزنگ کا عمل تیز کردیا گیا ہے۔ روزانہ کی بنیاد پر دسیوں مشینیں سینیٹائزنگ کا کام کر رہی ہیں۔ روزانہ 900 لٹر سینیٹائزر رکھے جارہے ہیں۔
ہر شفٹ میں 300 لٹر کے لگ بھگ سینیٹائزر استعمال ہورہے ہیں۔ علاوہ ازیں قالینوں اور چھتوں کو سینیٹائز کرنے میں روزانہ 3500 لٹر مادہ استعمال کیا جا رہا ہے۔ مسجد الحرام میں ایئرکنڈیشن، ایئرسسٹم کی صفائی روزانہ نو بار کی جاتی ہے اور اسے بالائے بنفشی شعاعوں سے سینیٹائز کیا جا رہا ہے۔
مسجد کی انتظامیہ نے زائرین کے مسجد الحرام میں داخلے کے لیے 262 دروازوں پر انتظامات کیے ہیں۔ ان میں سے تیرہ معذوروں کے لیے ہیں۔ 24 گھنٹے 69 دروازے کھلے رہتے ہیں۔ جمعے کے دن مزید دروازے کھول دیے جاتے ہیں۔
آپ کی چھتری آپ کے ہاتھوں میں
سعودی عرب میں مقدس مساجد کی انتظامیہ نے اس سال خاص سکیم ’آپ کی چھتری آپ کے ہاتھوں میں‘ کے عنوان سے مسجد الحرام کے زائرین، نمازیوں اور اہلکاروں میں بارہ ہزار چھتریاں تقسیم کی ہیں۔
مقدس مساجد کی انتظامیہ یہ سکیم حج موسم کے حوالے سے چلا رہی ہے۔ انتظامیہ کے ماتحت سماجی خدمات کے ادارے کے انچارج جنادی بن علی مدخلی نے کہا کہ ’مقدس مساجد کی انتظامیہ عازمین حج ، نمازیوں،مسجد الحرام کے زائرین اور اہلکاروں کو دھوپ اور کورونا وبا سے بچانے کے لیے متعدد اقدامات کررہی ہے‘
تیز دھوپ اور گرمی سے بچاو کا کے لیے چھتری سے بہتر سہارا کوئی نہیں
انہوں نے کہا کہ ’آپ کی چھتری آپ کے ہاتھوں میں‘ ان سکیموں میں سے ایک ہے۔ جنادی بن علی مدخلی کا کہنا ہے کہ مقدس مساجد کی انتظامیہ چاہتی ہے کہ ’زائرین اور حج کے عازمین نیز اس کے اہلکار اور کامیابی میں شریک اداروں کے کارکان صحت و سلامتی کے ساتھ رہیں‘۔
میدان عرفات میں خیمے نصب
اس سال حج کے دوران میدان عرفات میں 60 ہزار حجاج کو ٹھہرانے کے لیے خیمے نصب کردیے گئے ہیں۔بجلی کی وائرنگ کا کام بھی مکمل کرلیا گیا۔ تمام انتظامات سلامتی ضوابط کے مطابق کیے گئے ہیں۔ خیمہ پروجیکٹ کے ایک عہدیدار طارق حریری نے بتایا کہ’ میدان عرفات میں خیموں کا کل رقبہ 3 لاکھ مربع میٹر ہے۔ ہر حاجی کے لیے 5 میٹر کے لگ بھگ جگہ مختص کی گئی ہے۔
میدان عرفات میں خیموں کا منظر
‘کورونا وائرس سے بچاؤ کے لیے تمام حفاظتی تدابیر کی پابندی کی کوشش کی گئی ہے۔ طارق حریری کا کہنا تھا کہ ’ میدان عرفات میں بجلی کی وائرنگ کی لمبائی 100 کلو میٹر کے لگ بھگ ہے۔ 142 میگا واٹ بجلی استعمال ہوگی۔میدان عرفات حجاج کے استقبال کے لیے پوری طرح سے تیار ہے۔ یہاں حجاج 9 ذی الحجہ کو ظہر اور عصر کی نمازیں ایک ساتھ ادا کرتے ہیں۔- یہاں سے حجاج سورج غروب ہونے کے بعد مغرب کی نماز ادا کیے بغیر مزدلفہ کے لیے روانہ ہوتے ہیں اور وہاں وہ رات گزارتے ہیں
مسجد نبوی کے صحنوں میں نئے ٹائلز
سعودی عرب میں مسجد نبوی کے صحنوں میں نئے ٹائلز لگائے گئے ہیں۔ان کی خوبی یہ ہے کہ یہ گرمی جذب کرتے ہیں اور ان پر چلتے وقت زائرین ٹھنڈک محسوس کرتے ہیں۔
مسجد نبوی کے بیرونی صحنوں میں سفید یونانی سنگ مرمر کے ٹائلز ایک لاکھ 8 ہزار مربع میٹر کے رقبے میں لگائے گئے ہیں۔خاص قسم کا یہ سنگ مرمر یورپ، ایشیا اور افریقہ کے چند ملکوں سے منتخب کیا جاتا ہے۔ سب سے بہترین سنگ مرمر اٹلی کا ہوتا ہے۔ مسجد نبوی کے فرش کا بڑا حصہ اٹلی سے درآمد شدہ سنگ مرمر والے ٹائلز پر مشتمل ہے۔ 98 ہزار مربع میٹر کا فرش اطالوی ٹائلز سے آراستہ ہے۔ یہی سنگ مرمر مسجد نبوی کے ستونوں کے اوپر بھی لگائے گئے ہیں ان ستونوں کی تعدا د دو ہزار 345 ہے۔
مسجد نبوی میں نیا فرش ۔جو رہے گا گرمی میں بھی ٹھنڈا
علاوہ ازیں مسجد نبوی کے صدر دروازوں، چھوٹے داخلی دروازوں اور ستونوں کے درمیان واقع مقامات پر اسلامی نقش و نگار سے مزین رنگین سنگ مرمر لگایا گیا ہے۔ یہ سنگ مرمر اٹلی کےعلاوہ سپین، انڈیا اور ترکی سے درآمد کیا گیا۔ مسجد نبوی کی زمینی منزل کی دیواروں اور چھت پر پرتگال کا معروف سنگ مرمر روزا لگا ہے۔ یہ 4700 مربع میٹر میں بچھایا گیا ہے۔
Unique Scenes!
— 𝗛𝗮𝗿𝗮𝗺𝗮𝗶𝗻 (@HaramainInfo) July 17, 2021
Tawaaf Al Qudum (Tawaf of Arrival) currently taking place in the Mataaf area of Masjid Al Haram. #Hajj 2021@sultan_mr_ pic.twitter.com/HS3lQS8K3A