کراچی:کراچی کے علاقے کورنگی مہران ٹاؤن میں کیمیکل فیکٹری میں آگ لگنے سے 15 مزدور موقع پر ہی جھلس کر جاں بحق ہوگئے۔
فائر بریگیڈ حکام کے مطابق فیکٹری میں مختلف اشیاء کے بنانے میں استعمال ہونے والا کیمیکل موجود تھا، آگ کیمیکل کے ڈرم میں لگی اور آگ پھیلتی گئی۔
آگ کی شدت سے عمارت کے کچھ حصے گرنے لگ گئے ہیں، فائربریگیڈ کے مطابق امدادی کارروائی کے دوران 2 ریسکیو اہلکار زخمی ہوئے ،ایک اہلکار فیکٹری کی دوسری منزل سے گر کر زخمی ہوا۔
پولیس کا کہنا ہے کہ فیکٹری کی تمام کھڑکیاں گِرل لگا کر بند کی گئی تھیں، کمروں میں کھڑکیوں کے ساتھ سامان رکھ دیا گیا تھا تاکہ کوئی کھڑکی تک نہ آسکے، بظاہر ان اقدامات کا مقصد فیکٹری میں چوری کا روکنا معلوم ہوتا ہے۔
کیمیکل فیکٹری رہائشی پلاٹ پر ہے، کے ڈی اے حکام ریسکیو ذرائع کا کہنا ہے کہ ہلاکتوں کی تعداد بیس سے زائد ہونے کا امکان ہے۔ آگ سے اندر کسی کے زندہ بچ جانے کے امکانات انتہائی معدوم ہیں، کوئی معجزہ ہی شاید کسی کو بچا سکے گا۔
A fire broke out in a chemical factory in #karachi,14 workers died. pic.twitter.com/nqIV63FZW9
— Khurram Ansari (@khurram143) August 27, 2021
چھیپا اور دیگر امدادی کارکنوں کی جانب سے فیکٹری میں پھنسے دیگر افراد کو نکالنے کی کوششیں جاری ہیں جبکہ ہلاک ہونے والے افراد کو چھیپا ایمبولینس کے ذریعے جناح ہسپتال منتقل کردیا گیا۔
صوبائی حکومت کے ترجمان مرتضیٰ وہاب نے میڈیا کو بتایا کہ فائر فائٹرز نے آگ پر قابو پالیا ہے۔
انہوں نے مزید بتایا کہ آگ لگنے کی وجوہات جاننے کے لیے متعلقہ افسران کو ہدایات جاری کردی گئی ہیں، جو اس بات کا بھی پتہ لگائیں گے کہ فیکٹری کے مالک نے عمارت میں آگ بھجانے کے آلات لگا رکھے تھے یا نہیں۔
واقعے کے بعد چیف سیکریٹری سندھ ممتاز علی شاہ نے کمشنر کراچی اور سیکریٹری لیبر سے واقعے کی رپورٹ طلب کرلی۔ دوسری جانب انہوں نے سیکریٹری صحت کو بھی ہدایات جاری کیں کہ زخمیوں کو فوری طبی سہولیات فراہم کی جائیں۔
