جدہ :سعودی وزارت داخلہ نے حج سیزن کے دوران وزٹ ویزا ہولڈرز کو رہائش فراہم کرنے کے حوالے سے خبردار کیا ہے۔ یکم سے 14 ذی الحجہ تک مکہ مکرمہ اور مقدس مقامات میں ہوٹلوں، اپارٹمنٹس، نجی مکانات یا عازمین کی رہائشی مراکز سمیت کسی بھی جگہ وزٹ ویزا ہولڈرز کو رہائش فراہم کرنے، شیلٹر دینے یا غیرقانونی قیام میں مدد دینے پر ایک لاکھ ریال تک جرمانہ عائد کیا جائے گا۔
ممنوعہ مدت میں وزٹ ویزا ہولڈرز کو رہائش دینا قابل سزا جرم
سعودی وزارت داخلہ نے واضح کیا ہے کہ یکم ذوالقعدہ سے 14 ذوالحجہ تک کسی بھی قسم کے وزٹ ویزا پر آنے والے افراد کو مکہ مکرمہ، منیٰ، مزدلفہ یا عرفات میں قیام کی اجازت نہیں ہے۔ اگر کوئی ہوٹل، اپارٹمنٹ، رہائشی مرکز یا نجی مکان وزٹ ویزا ہولڈر کو اس مدت میں قیام کی سہولت فراہم کرے گا، تو اسے ایک لاکھ ریال تک جرمانہ کیا جائے گا۔
وزارت داخلہ کے مطابق، اگر ایک سے زیادہ افراد کو رہائش دی گئی یا سہولت فراہم کی گئی تو جرمانے کی رقم میں اضافہ کیا جائے گا۔ اسی طرح، اگر کسی کو قیام، شیلٹر یا نقل و حمل میں مدد فراہم کی گئی، تو بھی قانونی کارروائی عمل میں لائی جائے گی۔
وزارت نے شہریوں اور مقیم غیر ملکیوں پر زور دیا ہے کہ وہ حج قواعد و ضوابط پر مکمل عمل کریں تاکہ حجاج کرام اپنی عبادات اطمینان اور سلامتی کے ساتھ ادا کر سکیں۔ کسی بھی خلاف ورزی کی صورت میں فوری اطلاع دینے کی بھی تلقین کی گئی ہے۔
وزارت نے یاد دہانی کرائی کہ وہ افراد جو بغیر ’مکہ پرمٹ‘ کے حج کی کوشش کریں گے، ان پر 20 ہزار ریال جرمانہ عائد کیا جائے گا۔ اس کے ساتھ مملکت میں داخلے پر پابندی بھی لگائی جا سکتی ہے۔
اگر کوئی شخص اپنے نام پر وزٹ ویزے جاری کراتا ہے اور ان ویزا ہولڈرز میں سے کوئی ممنوعہ مدت میں مکہ مکرمہ میں پایا جاتا ہے تو ویزہ جاری کرنے والے پر فی فرد ایک لاکھ ریال جرمانہ عائد کیا جائے گا۔
ایسے افراد جو وزٹ ویزا رکھنے والوں کو مکہ مکرمہ یا مشاعر مقدسہ پہنچانے کے لیے نقل و حمل کی سہولت فراہم کریں یا ان کے لیے قیام کا بندوبست کریں، ان پر بھی فی فرد ایک لاکھ ریال جرمانہ عائد کیا جائے گا۔
Moments before Fajar in Makkah. 05 May 2025
— 𝗛𝗮𝗿𝗮𝗺𝗮𝗶𝗻 (@HaramainInfo) May 5, 2025
Dont forget to pray Fajar. May Allah never let you miss a Fajr
.
.
.#Haramain #Haramaininfo #Hajj2025 pic.twitter.com/L5qTlG5lxw
وہ غیرملکی جو غیرقانونی طور پر سرحد پار کر کے مملکت میں داخل ہوں اور حج سیزن کے دوران مکہ مکرمہ میں موجود ہوں، انہیں فوری طور پر ڈی پورٹ کر کے 10 سال کے لیے مملکت میں داخلے پر پابندی عائد کر دی جائے گی۔
وزارت داخلہ نے ایک بار پھر واضح کیا ہے کہ حج کے ضوابط کی خلاف ورزی برداشت نہیں کی جائے گی، اور خلاف ورزی کرنے والے چاہے سعودی شہری ہوں یا غیر ملکی، ان کے خلاف بلا امتیاز کارروائی کی جائے گی۔
