آواز دی وائس، نئی دہلی

ہندوستان کے اعتراض کے بعد چین نے کہا  سرحد پر صورتحال فی الحال مستحکم ہے۔ مشرقی لداخ سرحد پر چین کی حرکات پر ہندوستان کے اعتراض کے بعد چین نے وضاحت کی ہے۔ دراصل وزارت خارجہ نے لائن آف ایکچوئل کنٹرول کے قریب فوجی اور فضائی سرگرمیوں کی رپورٹس پر ناراضگی ظاہر کی تھی۔

اس پر ہندوستان میں چین کے سفیر سن ویڈونگ نے کہا کہ چین سرحد پر تمام سرگرمیاں ہندوستان اور چین کے درمیان طے پانے والے معاہدوں کے مطابق کرتا ہے۔ مجھے کسی بھی قسم کی فوجی اور فضائی سرگرمیوں کا کوئی خاص علم نہیں ہے۔ سرحد پر صورتحال فی الحال مستحکم ہے۔

1998 کےIC 814 ہائی جیکنگ کے ماسٹر مائنڈ میں سے ایک جیش محمد کے عبدالرؤف اصغر پرUNSC میں چین کی تکنیکی گرفت کے بارے میں پوچھے جانے پر، انہوں نے کہا کہ چین کو درخواست کا بغور مطالعہ کرنے کے لیے مزید وقت درکار ہے۔ اس کے بعد طریقہ کار کے بارے میں فیصلہ کیا جائے گا۔ چین ہر قسم کی دہشت گردی کی سختی سے مخالفت کرتا ہے۔

ہندوستان میں چینی سفیر نے کہا کہ چین ہندوستانی طلباء کا خیر مقدم کرتا ہے۔ چین میں اپنی تعلیم شروع کرنے والے ہندوستانی طلباء کی پہلی کھیپ مستقبل قریب میں بیجنگ پہنچے گی۔ دونوں ممالک کے متعلقہ محکمے مل کر کام کر رہے ہیں۔

اس سے قبل ہندوستان اور چین کے معاملے پر وزیر خارجہ ایس جے شنکر نے کہا تھا کہ ہم نے اپنا موقف برقرار رکھا ہے کہ اگر چین سرحدی علاقوں میں امن کو خراب کرتا ہے تو اس سے ہمارے تعلقات متاثر ہوں گے۔ ہمارے تعلقات نارمل نہیں ہیں، وہ نارمل نہیں ہو سکتے کیونکہ سرحدی حالات نارمل نہیں ہیں۔

جے شنکر نے کہا تھا کہ ہندوستان مسلسل اپنے موقف پر قائم ہے کہ اگر چین سرحدی علاقوں میں امن کو خراب کرتا ہے یا قوانین کی خلاف ورزی کرتا ہے تو اس سے دونوں ممالک کے تعلقات متاثر ہوں گے۔ جے شنکر نے کہا کہ ہم نے کمانڈر سطح پر 15 دور کی بات چیت کی ہے۔ ان جگہوں سے انخلاء کے حوالے سے دونوں فریقین کی جانب سے کئی اہم فیصلے کیے گئے ہیں۔ ہم نے ان پر عمل درآمد بھی شروع کر دیا ہے۔

انہوں نے کہا کہ اب بھی کچھ جگہیں ایسی ہیں جہاں سے وہ پیچھے نہیں ہٹے ہیں۔ تاہم ہم اس موقف پر قائم ہیں کہ اگر چین سرحدی علاقوں میں امن خراب کرے گا تو اس سے تعلقات متاثر ہوں گے۔ جے شنکر دو سال قبل لداخ میں جھڑپ کے بعد چین کے ساتھ تعلقات میں تناؤ سے متعلق ایک سوال کا جواب دے رہے تھے۔