ڈھاکہ(بنگلہ دیش): بنگلہ دیش میں کئی مقامات سے ہندووں پر حملے کی خبریں آئی ہیں۔ بعض جگہوں پر پوجا پنڈالوں اور مندروں پر بھی حملے ہوئے ہیں۔ اب تازہ اطلاع یہ ہے کہ بنگلہ دیش میں ایک اسکان مندر پر حملہ ہوا ہے اورتوڑ پھوڑ کی گئی ہے۔
بنگلہ دیش کی وزیر اعظم شیخ حسینہ کے تمام دعوؤں کے باوجود ملک میں ہندو مندروں پر حملے بڑھ رہے ہیں۔ اب، بنگلہ دیش کے علاقے نواکھالی میں اسکان مندر پر شدت پسندوں نے حملہ کیا ہے۔
بتایا جا رہا ہے کہ ، ایک دن پہلے ، بنگلہ دیش میں کئی درگا پنڈالوں پر حملہ کیا گیا اور توڑ پھوڑ کی گئی اور اس کے بعد تقریبا دوسوافراد کے ایک ہجوم نے نواکھالی کے علاقے میں اسکون مندر پر حملہ کیا ، مندر پر جمعہ کو حملہ کیا گیا۔
حملے کی وجہ سے مندر کو بھی کافی نقصان پہنچا ہے ، یہی نہیں ، حملہ آوروں نے مندر کے سامنے بنائے گئے درگا پوجا پنڈال کو بھی تباہ کر دیا۔ اس دوران بنیاد پرست حملہ آوروں نے اسکان مندر کے رکن پرتھ داس کو بے دردی سے قتل کر دیا۔
ISKCON along with other Hindu community members protests in the streets of Noakhali, Bangladesh over the recent attacks on the devotees and templeshttps://t.co/8SRFxWzsT2
— ISKCON (@iskcon) October 16, 2021
اس حوالے سے اسکان کی طرف سے جاری بیان میں کہا گیا ہے کہ ’’ پارتھ کی لاش مندر کے قریب ایک تالاب سے ملی ہے۔ اسکان مندرسے وابستہ رادھارمن داس نے ٹویٹ کرتے ہوئے کہا کہ پارتھا داس کل سے لاپتہ تھے اور آج صبح ان کی لاش تالاب میں تیرتی ہوئی ملی۔
ان کو شدید مارا پیٹا گیا اور صرف یہی نہیں ، ظلم کے تمام حدوں کو پار کرتے ہوئے جسم کے اعضاء باہر نکال لیے گئے۔
اس کے علاوہ بنگلہ دیشی میڈیا رپورٹس کے مطابق یہ بات بھی سامنے آئی ہے کہ حملے میں 4 افراد ہلاک ہوئے ، جس کے بعد بنگلہ دیشی وزیر اعظم شیخ حسینہ کی ہدایات پر ملک کے 22 اضلاع میں نیم فوجی دستے تعینات کیے گئے ہیں۔
فرقہ وارانہ ہم آہنگی کو خراب کرنے کی کوشش کرنے والوں کو سخت انتباہ دیتے ہوئے ، انھوں نے وعدہ کیا ہے کہ کومیلا میں فرقہ وارانہ تشدد کے مرتکب افراد کے خلاف کارروائی کی جائے گی۔
