بارہ بنکی:(ابوشحمہ انصاری)سنیما زندگی سے مختلف نہیں ہے اردو اور اودھ کی تہذیب و ثقافت کا جو دنیا میں ڈنکا بجتا ہے اس میں فلموں نے بہت اہم رول ادا کیا ہے۔اودھ کی وراثت کو سنجوئے رکھنے میں فلموں نے نہایت ہی اہم رول ادا کیا ہے۔تمام فنون چاہے وہ رقص،موسیقی، پینٹنگ،شاعری یا فلم سازی ہو اس کا استعمال تعمیری بھی ہو سکتا ہے اور تخریبی بھی۔فن کے ذریعہ انسان سماج اورمعاشرے کو سنوار سکتا ہے کیونکہ فن جب تک ایک مشق یا تربیت سے آگے بڑھ کر جب تک عبادت و ریاضت اور روحانیت کی حدود میں داخل نہیں ہو گا اس وقت تک اس میں جان نہیں پڑ سکتی۔

یہ باتیں مشہور و معروف فلم ساز، فیشن ڈیزائنر، مصور، صوفی اور سماجی کارکن مظفر علی نے بطور مہمانِ خصوصی امریکن انسٹی ٹیوٹ آف انڈین اسٹڈیزمیں"ہندوستانی فلموں میں تہذیب اودھ"کتاب کی رسمِ رونمائی کے موقعہ پر کہی۔ انھوں نے مزید کہا کہ فلموں کے ذریعہ عوام اور خواص کے ایک بڑے طبقے تک اپنی بات پہنچائی جا سکتی ہے۔اودھ کی تہذیب و ثقافت میرے لکھنؤ، کولکاتا، ممبئی اور پھر دہلی کے پڑاؤ میں ہمیشہ ساتھ ساتھ رہی۔ ڈاکٹر منتظر قائمی کی کتاب "ہندوستانی فلموں میں تہذیب اودھ" جو کہ پہلے اردو میں بارہ برس قبل شائع ہو کر منظر عام پر آچکی ہے اب ہندی میں ڈاکٹر پرارتھنا سنگھ کی وجہ سے آپ سب کے درمیان ہے کیونکہ انھوں نے ہندی کے بڑے طبقے تک اس کتاب کو پہنچانے میں مدد کی ہے جس کے ذریعہ اودھ کے متعدد فنون کیسے فلموں تک پہنچے ہیں اس کا مشاہدہ کیا جا سکتا ہے۔