سری نگر:وادی کشمیر میں شبانہ درجہ حرارت میں قدرے اضافہ درج ہونے سے اگر چہ لوگوں نے راحت کی سانس لی ہے تاہم گلمرگ اور پہلگام میں منفی درجہ حرارت ریکارڈ کیا گیا

محکمہ موسمیات کی پیش گوئی کے مطابق وادی کشمیر میں برفباری اور بارشوں کا فی الحال کوئی امکان نہیں ہے محکمہ موسمیات کے ایک ترجمان نے بتایا کہ ’مشہور سیاحتی مقامات گلمرگ اور پہلگام وادی کشمیر کے سرد ترین مقامات رہے جہاں کم سے کم درجہ حرارت بالترتیب منفی 3.0 ڈگری سینٹی گریڈ اور منفی 2.0 ڈگری سینٹی گریڈ ریکارڈ کیا گیا‘ ۔

انہوں نے کہاکہ سری نگر میں کم سے کم درجہ حرارت 5.5 ڈگری سینٹی گریڈ ریکارڈ کیا گیا جبکہ گزشت شب کم سے کم درجہ حرارت 5.2 ڈگری سینٹی گریڈ ریکارڈ ہوا تھا۔ گیٹ وے آف کشمیر کے نام سے جانے والے قصبہ قاضی گنڈ میں کم سے کم درجہ حرارت 6.2 ڈگری سینٹی گریڈ درج کیا گیا جہاں گذشتہ شب کا کم سے کم درجہ حرارت 3.2 ڈگری سینٹی گریڈ ریکارڈ ہوا تھا۔

کوکر ناگ میں کم سے کم درجہ حرارت 5.2 ریکارڈ کیا گیا جہاں گزشتہ شب کم سے کم درجہ حرارت 4.6 درج کیا گیا ۔ سرحدی ضلع کپوارہ میں کم سے کم درجہ حرارت 3.1 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت 4.8 ڈگری سینٹی گریڈ ریکارڈ ہوا تھا۔

محکمہ موسمیات کی پیش گوئی کے مطابق وادی کشمیر فی الحال موسم مجموعی طور پر خشک رہنے کا امکان ہے۔ دریں اثنا وادی کشمیر میں اتوار کے روز دن بھر ہلکی دھوپ کھلی رہی جس سے لوگوں کو پارکوں، دکان کے تھڑوں اور صحنوں میں لطف اندوز ہوتے ہوئے دیکھا گیا۔

موسم میں بہتری واقع ہونے کے ساتھ ہی دیہی علاقوں میں کسانوں نے اپنے کھیتوں اور باغوں میں دوبارہ کام کرنا شروع کیا ہے۔ علاوہ ازیں اتوار کے روز لوگوں نے دارلخلافہ سرینگر کے مشہور سنڈے مارکیٹ میں گرم لباس ، گرم کمبلوں وغیرہ کی جم کر خریداری کی ۔ (ایجنسی ان پٹ )