سری نگر/ آواز دی وائس

جموں و کشمیر کے پہلگام میں ہوئے دہشت گرد حملے سے پورا ملک غمزدہ ہے، وہیں حکومت اور تفتیشی ایجنسیاں سرگرمِ عمل ہیں۔ تحقیقاتی ایجنسی نے حملے میں ملوث دہشت گردوں کے دو خاکے جاری کیے ہیں۔ قابلِ ذکر ہے کہ پہلگام میں ہوئے اس دہشت گردانہ حملے میں 26 معصوم افراد جاں بحق ہو گئے۔ دنیا بھر میں اس واقعے کی سخت الفاظ میں مذمت کی گئی ہے۔

مرکزی ایجنسی کے ذرائع کے مطابق، پاکستان میں موجود کالعدم تنظیم لشکرِ طیبہ  سے وابستہ ایک پراکسی دہشت گرد تنظیم "دی ریزسٹنس فرنٹ" نے اس حملے کی ذمہ داری قبول کی ہے۔

"دی ریزسٹنس فرنٹ" لشکرِ طیبہ کی ایک پراکسی تنظیم ہے، جس کا قیام 2019 میں جموں و کشمیر میں آرٹیکل 370 کی منسوخی کے بعد عمل میں آیا تھا۔ اس تنظیم کی شروعات ایک آن لائن یونٹ کے طور پر ہوئی، لیکن بعد میں "تحریکِ ملت اسلامیہ" اور "غزنوی ہند" جیسے موجودہ گروپوں کے عناصر کو شامل کر کے یہ ایک مکمل دہشت گرد تنظیم میں تبدیل ہو گئی۔

وزیر اعظم مودی نے طلب کی ہنگامی میٹنگ

پہلگام میں دہشت گردانہ حملے سے دلبرداشتہ ہو کر وزیر اعظم نریندر مودی نے اپنا سعودی عرب کا دورہ منسوخ کر کے فوری طور پر  ہندوستان واپسی کی۔ دہلی پہنچتے ہی ہوائی اڈے پر انہوں نے ایک ہنگامی اجلاس طلب کیا۔ اس نہایت اہم اجلاس میں قومی سلامتی کے مشیر اجیت ڈوبھال، وزیر خارجہ ایس جے شنکر، اور خارجہ سیکرٹری موجود تھے۔ وزیر اعظم کی غیر ملکی دورے سے واپسی کے فوری بعد اس اعلیٰ سطحی اجلاس میں حملے کی سنگینی، عالمی ردعمل، اور سیکیورٹی حکمتِ عملیوں پر تفصیلی غور و خوض کیا گیا۔