نئی دہلی/ آواز دی وائس

 پہلگام دہشت گرد حملے کے بعد پورے ملک میں خوف و ہراس کا ماحول ہے۔ اس دوران کانگریس کے صدر ملکارجن کھڑگے اور رہنما راہل گاندھی نے وزیر اعظم نریندر مودی کو ایک خط لکھ کر دہشت گرد حملے پر بحث کی درخواست کی ہے۔ خط میں پارلیمنٹ کا خصوصی اجلاس بلانے کا بھی مطالبہ کیا گیا ہے۔

گزشتہ ہفتے ہوئے دہشت گرد حملے کے بعد سے حزب اختلاف کے کئی ممبران پارلیمنٹ نے حکومت سے اسی طرح کی درخواست کی ہے۔ وزیر اعظم کو لکھے گئے خط میں مزید کہا گیا ہے کہ اس وقت اتحاد اور یکجہتی کی اشد ضرورت ہے، اور اس نازک وقت میں ہندوستان کو یہ ظاہر کرنا ہوگا کہ ہم دہشت گردی کے خلاف ہمیشہ متحد ہیں۔

کھڑگے کے مطابق، پارلیمنٹ کا خصوصی اجلاس بلا کر 22 اپریل کو پہلگام میں بے گناہ شہریوں پر ہوئے سفاکانہ دہشت گرد حملے سے نمٹنے کے لیے ہمارا اجتماعی عزم اور ارادہ کا طاقتور مظاہرہ کیا جائے گا۔ ہمیں امید ہے کہ اجلاس جلد از جلد بلایا جائے گا۔ کانگریس کے ترجمان جے رام رمیش نے منگل کی صبح یہ خط جاری کیا۔

راہل گاندھی نے بھی وزیر اعظم مودی سے یہ اپیل کی

راہل گاندھی نے بھی وزیر اعظم مودی کو خط لکھا ہے جس میں انہوں نے کہا کہ محترم وزیر اعظم جی، پہلگام میں ہوئے دہشت گرد حملے نے ہر ہندوستانی کو جھنجھوڑ کر رکھ دیا ہے۔ اس نازک وقت میں ہندوستان کو یہ دکھانا ہوگا کہ ہم دہشت گردی کے خلاف ہمیشہ متحد رہیں گے۔ حزب اختلاف کا ماننا ہے کہ پارلیمنٹ کے دونوں ایوانوں کا ایک خصوصی اجلاس بلایا جانا چاہیے، جہاں عوامی نمائندے اپنی یکجہتی اور عزم کا مظاہرہ کر سکیں۔ ہم درخواست کرتے ہیں کہ ایسا خصوصی اجلاس جلد از جلد بلایا جائے۔