کانگڑا: پانی کے تیز بہاؤ کی وجہ سے، پنجاب-ہماچل کو ملانے والی چکی ندی پر واقع نارو گیج ریلوے پل ہفتہ کو بہہ گیا۔ پہاڑوں میں شدید بارش کی وجہ سے چکی ندی میں ان دنوں طغیانی ہے جس کی وجہ سے پنجاب کے پٹھان کوٹ اور ہماچل کے کانگڑا جوگیندر نگر کو ملانے والی نارو گیج ریلوے لائن کے ستون گر گئے۔

آپ کو بتاتے چلیں کہ چند روز قبل پل کے تین ستون اپنی جگہ سے پھسل گئے تھے۔ جس کے باعث محکمہ ریلوے نے نارو گیج ریلوے لائن پر چلنے والی ٹرینوں کا آپریشن روک دیا تھا۔ لیکن اب ریلوے لائن اپنے ایک ستون کے مکمل ٹوٹنے اور دو ستونوں کے ٹوٹ جانے کی وجہ سے ہوا میں معلق ہے جس کی وجہ سے آنے والے کئی ماہ تک پنجاب اور ہماچل کا ریلوے رابطہ ٹوٹنے کا خدشہ ہے۔

اس سلسلے میں محکمہ کی جانب سے کوئی اطلاع نہیں دی گئی ہے۔ مقامی لوگوں کا کہنا ہے کہ پل ٹوٹنے کی وجہ سے اب پنجاب ہماچل کے لوگوں کو آنے جانے میں کافی پریشانیوں کا سامنا کرنا پڑے گا۔

ٹرین کا کرایہ کم ہونے کی وجہ سے لوگوں کو سفر کرنا بہت آسان تھا۔ زیادہ تر کاروبار بھی اسی راستے سے ہوتا تھا۔ لیکن اب لوگوں کو زیادہ پیسے خرچ کرکے بسوں میں سفر کرنا پڑے گا۔ لوگوں نے بتایا کہ یہ واقعہ آج صبح 6 بجے پیش آیا۔ چکی ندی میں پانی کا تیز بہاؤ تھا جس کی وجہ سے ستون گر گیا۔