ٹھانے(پی ٹی آئی)  این سی پی (ایس پی) کے سربراہ شرد پوار نے بدھ کے روز کانگریس کے اس مطالبے کی حمایت کی کہ پہلگام دہشت گرد حملے پر پارلیمنٹ کا خصوصی اجلاس بلایا جائے۔ انہوں نے کہا کہ اس سے یہ پیغام جائے گا کہ ملک متحد ہے۔ٹھانے میں ’تولجا بھوانی‘ مندر میں پران پرتشٹھا کی تقریب میں شرکت کے بعد ایک پریس کانفرنس سے خطاب کرتے ہوئے پوار نے کہا کہ کشمیر میں سیاحوں کا قتل عام دراصل ملک پر حملہ ہے، اور اس معاملے میں مرکز جو بھی قدم اٹھائے گا وہ اس کی حمایت کریں گے۔انہوں نے کہا  کہ ہمارے کچھ ساتھیوں نے (خصوصی اجلاس کے لیے) مطالبہ کیا ہے۔ پورا ملک اس مسئلے پر متحد ہے۔ تمام پارٹیاں اور پارلیمنٹ اس پر متفق ہیں۔ پہلگام پر خصوصی اجلاس دنیا کو یہ پیغام دینے میں مفید ہوگا کہ ہم متحد ہیں۔

کانگریس صدر ملکارجن کھڑگے اور قائد حزب اختلاف راہل گاندھی نے وزیر اعظم نریندر مودی کو خط لکھ کر ان سے درخواست کی ہے کہ پہلگام دہشت گرد حملے پر تبادلہ خیال کے لیے پارلیمنٹ کا خصوصی اجلاس بلایا جائے اور ایک اجتماعی عزم کا مظاہرہ کیا جائے۔سابق وزیر دفاع شرد پوار نے کہا، "ہم وزیر اعظم نریندر مودی اور ان کے ساتھیوں کے جو بھی اقدامات ہوں گے، ان کی مکمل حمایت کریں گے۔انہوں نے مزید کہا کہ ایسے معاملات میں مذہب، ذات اور زبان کو نہیں لایا جانا چاہیے۔قابل ذکر ہے کہ 22 اپریل کو جنوبی کشمیر کے ضلع اننت ناگ میں واقع مشہور سیاحتی مقام پہلگام کے قریب ایک چراگاہ پر دہشت گردوں نے فائرنگ کر دی تھی، جس میں 26 افراد، جن میں اکثریت سیاحوں کی تھی، ہلاک اور کئی زخمی ہوئے تھے۔

میڈیا سے گفتگو کے دوران جب ان سے شیو سینا (یو بی ٹی) کے سربراہ ادھو ٹھاکرے اور ان کے کزن راج ٹھاکرے (مہاراشٹر نو نرمان سینا کے سربراہ) کے درمیان مفاہمت کے امکان کے بارے میں سوال کیا گیا تو پوار نے کہا کہ اگر ایسا ہوتا ہے تو یہ ایک اچھا قدم ہوگا۔ جب دو خاندان ایک ساتھ آتے ہیں تو یہ ہمیشہ ایک مثبت پیش رفت ہوتی ہے۔جب ان سے پوچھا گیا کہ کیا وہ صرف منتخب مذہبی تقریبات میں شرکت کرتے ہیں تو پوار نے اسے آدھا سچ" قرار دیا۔انہوں نے کہا کہ جب میں مہاراشٹر کا وزیر اعلیٰ تھا، تو میں نے پندھرپور مندر میں کئی بار پوجا کی اور تولجا پور میں واقع تولجا بھوانی مندر کے بھی کئی بار درشن کیے۔"