نئی دہلی
کورونا کی غیر معمولی صورت حال کے پیش نظر آرمی اسپتالوں کے لئے آکسیجن پلانٹ جرمنی سے منگوائیں جائیں گے۔ وزارت دفاع کی طرف سے جاری بیان میں کہا گیا ہے کہ آرمڈ فورسز میڈیکل سروسز اسپتالوں کے لئے 23 موبائل آکسیجن پلانٹ اور کنٹینر جرمنی سے درآمد کرنے کا منصوبہ ہے ۔
جرمنی سے درآمد ہونے والے پلانٹ میں سے ہر ایک کی صلاحیت فی منٹ 40 لیٹر آکسیجن پروڈکشن کی ہوگی جبکہ ایک گھنٹے میں یہ 2400 لیٹر آکسیجن فراہم کریں گے ۔ اس طرح یہ 20 سے 25 مریضوں کو دن رات آکسیجن دے سکتے ہیں۔ ان کی سب سے بڑی خاصیت یہ ہے کہ یہ پلانٹ پورٹیبل ہیں یعنی کہیں بھی آسانی سے انہیں لے جایا جا سکتا ہے ۔ اچھی خبر یہ ہے کہ یہ پلانٹ ملک میں ایک ہفتے میں آجائیں گے۔
دوسری طرف وزارت دفاع نے مسلح افواج کے ان اسپتالوں میں شارٹ سروس کمیشن کے ریٹائر ہونے والے ڈاکٹروں کی خدمات میں اس سال 31 دسمبر تک توسیع کر دی ہے۔اس طرح ان اسپتالوں کو 238 ڈاکٹروں کی خدمت مل جائیں گی۔