اس سال مرکزی حکومت نے نیتا جی سبھاش چندربوس کی جینتی کو پراکرم دیوس کے طورپرمنانے کا اعلان کیا ہے- اس موقع پر وزیراعظم نریندرمودی کولکاتا کےوکٹوریہ میموریل میں منعقد ہونے والی تقریب کی صدارت کریں گے- یہاں نیتا جی پرمرکوز"آمرا نوٹن یونریبدوت" نام کے ایک ثقافتی پروگرام کا بھی اہتمام کیا گیا ہے-
پولیس ذرائع کے مطابق کولکاتا میں سخت حفاظتی بندوبست کیا گیا ہےاورنگرانی کے لئے دو ہزارپولیس والےتعینات ہیں- تقریب گاہ کے اطراف میں بنکر بنائے گئے ہیں اورسریع الحرکت دستے بھی موجود رہیں گے- ہرطرح کی سرگرمیوں پرنظر رکھنے کے لئےڈرون کیمروں کا بھی استعمال کیا جائے گا- پولیس کے مطابق کولکاتا کے سبھی بڑے چوراہوں پر ناکہ بندی اور تلاشی مہم جاری ہے-
پی ایم کے لئے اہم ہے ہری پورا
اپنے ٹویٹ میں وزیراعظم نےہری پورا کا ذکر کیا- وزیراعظم نے لکھا کہ "ہری پورا کا نیتا جی کے ساتھ خاص رشتہ ہے- 1938 کے ہری پورا میں ہونے والے تاریخی اجلاس میں ہی نیتا جی نے کانگریس کی صدارت سنبھالی تھی- ہری پورا میں ہونے والا کل کا پروگرام نیتا جی سبھاش چندر بوس کو خراج عقیدت ہوگا-"
وزیراعظم نے اپنے ٹویٹ میں 2009 میں ہونے والی نیتا جی جینتی کو بھی یاد کیا- اس وقت وزیراعظم گجرات کے وزیراعلی تھے- اسی دن گجرات سرکار نے ای گرام وشو گرام کی شروعات ہری پورا سے ہی کی تھی- اپنے ٹویٹ میں وزیراعظم مودی نے مزید لکھا کہ اس پہل سے گجرات کے آئ ٹی سیکٹر میں انقلاب آ گیا-
آج شام ساڑھے تین بجے وزیراعظم کولکاتا کی نیشنل لائبریری میں نیتا جی پر ایک بین اقوامی سیمینار سے خطاب کریں گے- اس کے بعد وکٹوریہ میموریل میں ایک پروگرام میں حصّہ لیں گے- وزیراعظم نیتا جی کے خطوط پر مشتمل ایک کتاب کا اجرا کریں گے اور اس کے ساتھ ہی آزاد ہند فوج کے سپاہیوں اور تحریک آزادی کے مجاہدین کو اعزاز سے نوازیں گے-