آواز دی وائس، نئی دہلی

ملک بھر میں ہو رہی بارش نے تباہی مچا رکھی ہے۔ اتراکھنڈ سے کیرالہ تک شدید بارش کی وجہ سے لوگوں کو کافی پریشانیوں کا سامنا کرنا پڑ رہا ہے۔ سیلاب اور لینڈ سلائیڈنگ کی وجہ سے بہت سی زندگیاں خطرے میں پڑ گئی ہیں۔ دریں اثنا ، اتراکھنڈ میں بدری ناتھ قومی شاہراہ سے ایک ویڈیو منظر عام پر آئی ہے۔

پیر کی شام ہائی وے کے قریب لامباگڑھ نالے میں پھنسی ہوئی ایک کار کو کرین کی مدد سے نکالا گیا۔ گاڑی میں مسافر بھی سوار تھے۔

لینڈ سلائیڈنگ کی وجہ سے گاڑی نالے میں پتھروں کی وجہ سے پھنس گئی۔ اسے بارڈر روڈز آرگنائزیشن نے بچایا۔

اسی دوران اتراکھنڈ کے چمپاواٹ میں چلتی ندی میں پانی کے تیز بہاؤ کی وجہ سے زیر تعمیر پل منہدم ہوگیا۔

اتراکھنڈ میں الرٹ جاری

ریاست اتراکھنڈ میں تین دن سے موسلا دھار بارش ہو رہی ہے۔ اس میں نیپال سے تعلق رکھنے والے تین مزدوروں سمیت پانچ افراد ہلاک ہو گئے ہیں جبکہ دو افراد زخمی ہوئے ہیں۔

اتراکھنڈ حکومت نے موسم ٹھیک ہونے تک چاردھم یاترا کو بھی روک دیا ہے۔

ہمالیہ کے مندروں کی طرف جانے والی گاڑیوں کی نقل و حرکت بھی روک دی گئی ہے۔ اتراکھنڈ میں نینی تال جھیل اپنی سطح سے اوپر بہہ رہی ہے۔ جھیل کا پانی سڑکوں پر آ گیا ہے اور گھروں اور عمارتوں میں داخل ہو رہا ہے۔

کیرالا میں ڈیم کے دروازے کھل گئے۔۔۔۔۔ کیرالہ میں بارش کی وجہ سے تباہی کا منظر دیکھا جا سکتا ہے۔ 12 اور 18 اکتوبر کے درمیان 38 افراد سیلاب اور لینڈ سلائیڈنگ میں اپنی جانیں گنوا چکے ہیں جبکہ 90 گھر مکمل طور پر تباہ ہو چکے ہیں۔ 702 گھروں کو بھی نقصان پہنچا ہے۔

اس بارش میں لوگوں کی بڑی تعداد بے گھر ہو گئی ہے۔ پانی کی سطح بڑھنے کے بعد منگل کی صبح 6 بجے ضلع ارناکولم میں ادمالیار ڈیم کے دو دروازے کھول دیے گئے۔