آواز دی وائس،نئی دہلی
دہلی ہائی کورٹ نے جمعرات کو جے این یو کیمپس کے اندر کوویڈ کیئر سنٹر کے قیام میں "غیر عملی" اور "سست روی" پر دہلی حکومت کی سرزنش کی ہے۔
خیال رہے کہ جواہر لال نہرو یونیورسٹی نے کوویڈ کیئرسنٹر کے قیام کے لیے سابرمتی ہاسٹل کے اندر پہلے ہی ایک جگہ مختص کی تھی، عدالت نے کہا کہ یہ دہلی حکومت کی بے عملی تھی، جس کی وجہ سے یہ سنٹر آج تک کام نہیں کر سکا۔
عدالت نے کہا کہ جے این یو کیمپس کے اندر ڈاکٹروں کا ایک الگ سیٹ بھی الاٹ کیا جانا تھا۔عدالت نے دہلی حکومت سے کہا کہ آپ کے لیے ایک ہدایت تھی۔ ان کے پاس ایک جگہ تھی، آپ کو اپنے ڈاکٹروں کو وہاں رکھنا تھا۔ آپ نے ایسا کیوں نہیں کیا اب ہم آپ کے سینئر افسر کو عدالت میں پیش کریں گے۔
عدالت نے صاف کہا کہ آپ کووڈ کیئر سنٹر شروع کریں گے۔ پچھلے دو تین مہینوں میں، میں نے آپ پر دباؤ نہیں ڈالا کیونکہ مجھے لگا کہ صورتحال بہتر ہے۔
دہلی حکومت نے اس پر عمل آوری کے لیے وقت مانگا ہے۔
عدالت جے این یو میں اسٹوڈنٹس یونین اور ٹیچرس یونین کے ساتھ ساتھ اس کے دو پروفیسروں کی طرف سے دائر کی گئی ایک رٹ پٹیشن پر غور کر رہی تھی، جس میں یونیورسٹی کیمپس میں کووڈ رسپانس ٹیم بھی شامل تھی، اور اندر آکسیجن کی سہولیات سمیت کووڈ کیئر سنٹر کی ضروریات پربھی غور کرنا تھا۔
درخواست گزاروں نے استدلال کیا کہ اپریل کے دوسرے ہفتے کے آس پاس، کورونا وائرس کی وبا کی دوسری لہر کے پھیلنے کی وجہ سے درخواست گزاروں نے جواب دہندہ یونیورسٹی کے رجسٹرار، جے این یو کے وائس چانسلر کے ساتھ ساتھ اے ڈی ایم/ کو کئی خط لکھے۔ متعلقہ علاقہ کے ایس ڈی ایم سے فوری مداخلت کا مطالبہ کیا گیا۔
تاہم درخواست گزاروں کی طرف سے اٹھائے گئے کسی بھی خدشات پر مذکورہ حکام میں سے کسی کی طرف سے کوئی جواب نہیں دیا گیا اور اس طرح درخواست دائر کی گئی۔
عدالت نے مشاہدہ کیا تھا کہ جے این یو کیمپس میں کووڈ ٹاسک فورس اور کووڈ رسپانس ٹیم پہلے سے ہی کام کر رہی ہے۔ جسٹس پرتیبھا سنگھ نے اس معاملے میں ایک ہدایت جاری کی تھی کہ کوویڈ کیئر سنٹر' قائم کرنے سے کورونا متاثرہ لوگوں کو علاحدہ رکھنے میں مدد ملے گی۔
