نیو دہلی :انفورسمنٹ ڈائریکٹوریٹ (ای ڈی) نے دہلی شراب پالیسی کیس میں منی لانڈرنگ کی تحقیقات کے سلسلے میں جمعہ کو ملک بھر میں 40 مقامات پر تلاشی مہم شروع کی۔ ذرائع نے بتایا کہ بنگلورو، حیدرآباد، نیلور (آندھرا پردیش)، چنئی اور دہلی-این سی آر میں تلاشی لی جارہی ہے۔ ذرائع نے مزید کہا کہ تلاشیاں زیادہ تر دکانداروں، تقسیم کاروں اور درمیانی افراد کے احاطے پر ہیں جن کا اس کیس سے تعلق ہونے کا شبہ ہے اور اس میں عام آدمی پارٹی (اے اے پی) کے کسی رہنما کا احاطہ شامل نہیں ہے۔

یہ چھاپے بی جے پی کے عام آدمی پارٹی کے خلاف ایک اور 'اسٹنگ آپریشن' کی ویڈیو جاری کرنے کے ایک دن بعد ہوئے ہیں، جس میں الزام لگایا گیا ہے کہ شراب گھوٹالے کے ایک ملزم کو یہ کہتے ہوئے سنا جا سکتا ہے کہ اب ختم کی گئی ایکسائز پالیسی اس طرح سے تیار کی گئی تھی جس طرح کچھ منتخب لوگوں نے فایدےحاصل کیے تھے۔ 6 ستمبر کو ای ڈی نے اس معاملے میں دہلی، نوئیڈا، گڑگاؤں، ممبئی، چنئی، چنڈی گڑھ اور جالندھر سمیت دیگر 35 مقامات پر تلاشی لی تھی۔

ای ڈی نے دہلی کے نائب وزیر اعلی منیش سسودیا اور 14 دیگر کے خلاف سی بی آئی ایف آئی آر کی بنیاد پر ستمبر کے پہلے ہفتہ میں اس معاملے میں منی لانڈرنگ کا معاملہ درج کیا تھا۔