شیخ محمد یونس ۔ حیدرآباد

حادثہ کے بعد ایک نوجوان زمین پر بے سدھ پڑا ہوا تھا ۔اسی وقت ایک وردی پوش کسی فرشتہ کی مانند نمودار ہوتا ہے۔وہ سڑک پر پڑے اس بے سدھ نوجوان کو سیدھا کرتا ہے اور پھر اس کے سینے پر دونوں ہاتھوں کی ہتھیلیوں کو رکھ کر زور زور سے دبانا شروع کرتا ہے۔اس وقت اس نوجوان کے دل کی دھڑکن رک چکی تھی۔ چند منٹ کے دوران اس مردہ نوجوان کے ہونٹوں میں حرکت ہوتی ہے۔ وردی پوش اپنی کوشش کی کامیابی پر سکون کی سانس لیتا ہے۔ایک زندگی بچ گئی بلکہ موت کے منھ سے واپس آگئی۔یہ واقعہ ماریڈ پلی سکندرآباد کا ہے۔ یہ وردی پوش تھا کانسٹبل عبد القادر۔جس نے ایک انسانی جان بچا کر سب کے سامنے ایک مثال قائم کردی۔

کیسے ہوا حادثہ

ماریڈ پلی پولیس اسٹیشن سے وابستہ کانسٹیبل عبدالقادر گشتی ڈیوٹی پر تھے۔ اس دوران وہ ماریڈ پلی مین روڈ پر پہنچے جہاں بونال تہوار کے پیش نظر سجاوٹ کا کام جاری تھا ۔ مندر کی کمان کو 25 سالہ ایم راکیش سجا رہا تھا کہ اچانک برقی شاک لگنے کی وجہ سے وہ بلندی سے نیچے گر پڑا ۔ راکیش کے دل کی دھڑکنیں رک گئی تھیں۔