آواز دی وائس، پریاگ راج

الہ آباد ہائی کورٹ نے جمعرات کو کاس گنج حراستی موت کے معاملے کی مجسٹریل انکوائری کے حکم پر اسٹیٹس رپورٹ طلب کی ہے،جس میں 22 سالہ الطاف کی موت ہوئی تھی۔

جسٹس انجنی کمار مشرا اور دیپک ورما کی ڈویژنل بنچ نے سرکاری وکیل کو حکم دیا کہ وہ 8 فروری2022 تک مجسٹریٹ کے ذریعہ کی گئی انکوائری کی اسٹیٹس رپورٹ داخل کریں۔
خیال رہے کہ عدالت الطاف کے والد چاند میاں کی درخواست پر سماعت کر رہی تھی، جس نے کہا تھا کہ انہیں ریاستی پولیس اور معاملے کی تحقیقات پر کوئی بھروسہ نہیں ہے۔ اس طرح اس نے سنٹرل بیورو آف انویسٹی گیشن (سی بی آئی) یا عدالت کی نگرانی میں تفتیش کی درخواست کی تھی۔

انہوں نے معاوضے کے طور پر ایک کروڑ روپے کا بھی مطالبہ کیا ہے۔

عدالت میں ایک عبوری درخواست بھی دائر کی گئی جس میں الطاف کا دوسرا پوسٹ مارٹم کرنے کے ساتھ ساتھ تھانے کی سی سی ٹی وی فوٹیج بھی طلب کی گئی ہے۔ گزشتہ سال 10 نومبر2021 کو کاس گنج کی ضلع انتظامیہ نے الطاف کی مبینہ حراست میں موت کی مجسٹریل انکوائری کا حکم دیا تھا۔

تاہم پولیس نے دعویٰ کیا تھا کہ الطاف نے کاس گنج تھانے کے بیت الخلا میں خودکشی کی تھی۔ تحقیقات کے دوران پانچ پولیس اہلکاروں کو معطل کر دیا گیا۔

 جب کہ 23 دسمبر 2021 کو ہائی کورٹ نے کاس گنج کے پولیس سپرنٹنڈنٹ کو اس معاملے میں جوابی حلف نامہ داخل کرنے کا حکم دیا تھا۔ یہ معلوم کرنے کے بعد کہ کوئی حلف نامہ داخل نہیں کیا گیا ہے، 2 فروری کو، عدالت نے کاس گنج کے ایس پی کو اگلے دن تک حلف نامہ داخل کرنے کی تنبیہ کی تھی، ایسا نہ کرنے پر اسے بھاری قیمت چکانی پڑے گی۔

آج، حکومت کے وکیل نے عدالت کو بتایا کہ حلف نامہ داخل کیا گیا تھا، لیکن ریکارڈ پر نہیں آیا تھا۔ اس کے مطابق معاملہ ملتوی کر دیا گیا۔ گزشتہ سال 13 دسمبر2021 کو ہائی کورٹ نے الطاف کی حراست میں موت کے تناظر میں اتر پردیش میں فاسٹ ٹریک پولیس کورٹس کے قیام کی درخواست میں نوٹس جاری کیا تھا۔

عدالت نے عرضی گزار پیپلز یونین فار سول لبرٹیز (PUCL) کو ہدایت کی کہ وہ اپنی درخواست سے دیگر ریاستوں کے حراستی تشدد کی تمام مثالیں حذف کردے۔ چیف جسٹس راجیش بندل کی سربراہی والی بنچ نے کہا کہ ایسا کرنے سے عدالت کے لیے الجھن پیدا ہوگی اور ریاست ایسی مثالوں پر جواب نہیں دے سکے گی۔