واشنگٹن: جب سے ایلون مسک ایکس (سابقہ ٹویٹر) کے مالک بنے ہیں، ان کی پوری توجہ ایکس سے پیسہ کمانے پر مرکوز ہے۔ پہلے ایلون مسک نے ایکس کی ادائیگی کی خدمات شروع کیں اور بلیو ٹک کی فیس مقررکی۔ بلیو ٹک پہلے مفت میں دستیاب تھا اور اس کے لیے کچھ شرائط تھیں۔ مالک بننے کے بعد، ایلون مسک نے شرائط تبدیل کیں اور بلیو ٹک کیلئے ادائیگی کا آغاز کیا۔
اب ایلون مسک نے نئے صارفین کے لیے بڑا منصوبہ بنایا ہے۔ ایلون مسک نے کہا ہے کہ ایکس پر آنے والے نئے صارفین کو پوسٹ کرنے کے لیے پیسے ادا کرنے ہوں گے اور یہ معمولی رقم ہوگی، حالانکہ انھوں نے یہ نہیں بتایا کہ اس کی فیس کیا ہوگی۔ ایلون مسک کا خیال ہے کہ فیس عائد کرنے کے بعد بوٹس اور جعلی اکاؤنٹس سے پوسٹس کم ہو جائیں گی کیونکہ اس وقت کوئی بھی نیا اکاؤنٹ بنا کر کسی کے حق میں پوسٹ کر رہا ہے۔
ایلون مسک نے کہا ہے کہ بوٹ کو روکنے کا یہی واحد طریقہ ہے۔ ایکس کی نئی پالیسی کے مطابق آپ کو ایکس پر پوسٹ کرنے، کسی کی پوسٹ کو لائیک کرنے، کسی پوسٹ کو بک مارک کرنے اور کسی پوسٹ کا جواب دینے کے لیے پیسے ادا کرنے ہوں گے۔ آپ مفت میں صرف ایک اکاؤنٹ کی پیروی کر سکیں گے۔ پلیٹ فارم پر اسپام کو روکنے کے لیے اس پالیسی کا طویل عرصے سے تجربہ کیا جا رہا ہے۔
