دوحہ: فیفا ورلڈکپ 2022 میں مراکش نے اپنا عمدہ کھیل جاری رکھتے ہوئے اس مرتبہ کینیڈا کو بھی ہرادیا اور راؤنڈ آف 16 میں پہنچ گیا۔ قطر کے الثمامہ اسٹیڈیم میں کھیلے گئے میچ میں مراکش کو جیت درکار تھی جو اس نے 1-2 کے مارجن سے حاصل کرلی۔

افریقی ٹیم نے میچ کے چوتھے منٹ میں ہی حکیم زیاش کے گول کی بدولت 0-1 کی برتری حاصل کرلی۔ مراکش نے 23ویں منٹ میں دوسرا گول بھی داغ دیا اور برتری 0-2 کرلی، اس مرتبہ يوسف النصيری نے گیند کو جال کی راہ دکھائی۔

میچ کے 40ویں منٹ میں نائف آكرد سے اپنے ہی گول میں گیند چلی گئی جس کے باعث میچ کا اسکور 1-2 ہوگیا۔ نہ صرف پہلا ہاف اسی اسکور پر ختم ہوا بلکہ دوسرے ہاف میں بھی کوئی ٹیم گول نہ بناسکی اور میچ 1-2 سے مراکش کے نام رہا

Top of the group and into the Round of 16! 🙌

What a feeling for Morocco 🇲🇦#FIFAWorldCup | #Qatar2022

— FIFA World Cup (@FIFAWorldCup) December 1, 2022

واضح رہے کہ اس فتح کے ساتھ ہی مراکش نے گروپ ایف میں ٹاپ کرکے راؤنڈ آف 16 کے لیے کوالیفائی کیا۔ خیال رہے کہ یہ دوسرا موقع ہے جب مراکش نے فیفا ورلڈکپ کے دوسرے مرحلے کے لیے کوالیفائی کیا ہے۔ اس نے اس سے قبل 1986 کے ورلڈکپ میں راؤنڈ آف 16 میں جگہ بنائی تھی۔