نئی دہلی: بی جے پی کی معطل لیڈر نوپور شرما کو یکم جولائی کو سپریم کورٹ نے پھٹکار لگائی تھی۔ سپریم کورٹ نے نوپور شرما کی درخواست پر سماعت کرتے ہوئے کہا کہ انہیں پورے ملک سے معافی مانگنی چاہئے۔ اس پر نوپور شرما کی وضاحت آ گئی ہے۔ نوپور شرما نے اس معاملے پر اپنی خاموشی توڑتے ہوئے کہا کہ میرے بیان کو توڑ مروڑ کر پیش کیا گیا۔ میرے خلاف جھوٹی خبریں پھیلائی گئیں۔

نوپور شرما نے اپنی وضاحت میں کہا، "میں نے ایک ٹی وی مباحثے کے دوران پیغمبر اسلام کے بارے میں جو بیان دیا تھا اسے سماج دشمن عناصر نے توڑ مروڑ کر ایڈٹ کیا تھا اور اسے مختلف سوشل میڈیا پلیٹ فارمز پر شیئر کیا گیا تھا۔ جس کے بعد مجھے اور میرے اہل خانہ کو جان سے مارنے کی دھمکیاں دی جارہی ہیں۔

نوپور شرما نے کہا کہ میرے خاندان کو عصمت دری اور قتل کی دھمکیاں مل رہی ہیں۔ جس کی وجہ سے میری اور میرے خاندان کی جان کو خطرہ ہے۔ ملک بھر میں جو بھی تنازعہ ہوا وہ میرے بیان کی وجہ سے نہیں بلکہ سماج دشمن عناصر نے میرے بیان کے ساتھ چھیڑ چھاڑ کر کے اسے وائرل کر دیا۔ جس کی وجہ سے ملک بھر میں میرے خلاف ایف آئی آر درج کی گئی ہیں۔

نوپور شرما نے مزید کہا کہ مجھے ملنے والی دھمکیوں پر کچھ کرنے کے بجائے مختلف ریاستوں میں میرے خلاف مقدمات درج کیے جا رہے ہیں۔ اس قسم کی ایف آئی آر سے میری آواز کو دبانے کی کوشش کی جا رہی ہے۔ اور آئین کی طرف سے مجھ سے اظہار خیال کا حق چھیننے کی کوشش کی جا رہی ہے۔

نوپور شرما کا کہنا ہے کہ ’’میں نے اپنے بیان پر معافی بھی مانگی تھی۔ جس میں واضح طور پر کہا گیا کہ اگر میرے بیان سے کسی کے جذبات کو ٹھیس پہنچی ہے تو میں اپنے الفاظ واپس لیتی ہوں۔ میرا مقصد کسی کے مذہبی جذبات کو ٹھیس پہنچانا نہیں تھا۔

بی جے پی سے معطل رہنما نے کہا کہ میرے خلاف جو بھی کیس، سیکشنز درج ہیں، سب غلط ہیں۔ ا بتادیں کہ اس سے قبل یکم جولائی کو نوپور شرما نے سپریم کورٹ میں درخواست دائر کی تھی کہ مجھے دھمکیاں مل رہی ہیں، میری جان کو خطرہ ہے۔ ایسے میں میرے خلاف مختلف ریاستوں میں درج مقدمات کو دہلی منتقل کیا جانا چاہیے۔ تاہم سپریم کورٹ نے ان کی درخواست کو مسترد کرتے ہوئے انہیں ہائی کورٹ جانے کو کہا۔