نئی دہلی: مرکزی وزیر اسمرتی ایرانی کی طرف سے دائر ہتک عزت کیس کی سماعت کرتے ہوئے دہلی ہائی کورٹ نے کانگریس لیڈر پون کھیرا سے کہا ہے کہ وہ ٹویٹ کو فوری طور پر ہٹا دیں۔ بار لائسنس تنازع کے الزامات کی سماعت کرتے ہوئے عدالت نے ٹویٹ فوری ہٹانے کی ہدایت کی ہے۔

ہائی کورٹ نے کہا کہ اگر 24 گھنٹے کے اندر ٹویٹ نہیں ہٹایا جاتا ہے تو سوشل میڈیا کمپنی اپنی جانب سے ٹویٹ کو ہٹا دے۔ دہلی ہائی کورٹ نے اسمرتی ایرانی ہتک عزت کیس میں کانگریس لیڈر پون کھیرا، جے رام رمیش اور نیتا ڈی سوزا کے خلاف مبینہ بار اور ریسٹورنٹ لائسنس تنازعہ پر پریس کانفرنس کرنے پر سمن جاری کیا ہے۔

مرکزی وزیر نے دہلی ہائی کورٹ میں 2 کروڑ روپے کا ہتک عزت کا دیوانی مقدمہ دائر کیا ہے۔ کیس کی اگلی سماعت 18 اگست کو ہوگی۔ مرکزی وزیر اسمرتی ایرانی نے اتوار کو کانگریس لیڈروں جے رام رمیش اور پون کھیرا کو قانونی نوٹس بھیجا، جس میں ان سے کہا گیا کہ وہ اپنے اور ان کی بیٹی کے خلاف لگائے گئے "بے بنیاد اور جھوٹے" الزامات کے لیے معافی مانگیں۔

ایرانی کا یہ اقدام کانگریس لیڈروں کے الزامات کے ایک دن بعد آیا ہے۔ رمیش اور کھیڑا نے ایرانی کی 18 سالہ بیٹی جوش ایرانی پر گوا میں غیر قانونی طور پر بار چلانے کا الزام لگایا تھا۔ وزیر کو نشانہ بناتے ہوئے انہوں نے وزیر اعظم نریندر مودی سے انہیں کابینہ سے برطرف کرنے کا مطالبہ بھی کیا تھا۔

قانونی نوٹس میں کہا گیا ہے کہ اگر کانگریس رہنما غیر مشروط طور پر معافی نہیں مانگتے اور اپنے الزامات واپس نہیں لیتے ہیں تو ایرانی ان کے خلاف دیوانی اور فوجداری کاروائی شروع کریں گی۔ ایرانی کی طرف سے بھیجے گئے نوٹس میں کہا گیا ہے کہ کانگریس لیڈروں نے وزیر کی نوجوان بیٹی پر حملہ کیا، جو یونیورسٹی میں سال اول کی طالبہ ہے۔

نوٹس میں کہا گیا ہے کہ جوش ایرانی نے کبھی بھی کسی بار یا کسی کاروباری ادارے کو چلانے کے لیے کسی لائسنس کے لیے درخواست نہیں دی۔ اس میں کہا گیا ہے کہ گوا میں محکمہ ایکسائز کی طرف سے انہیں کوئی وجہ بتاؤ نوٹس نہیں بھیجا گیا ہے جیسا کہ کانگریس لیڈروں نے الزام لگایا ہے۔ بیان میں کہا گیا، "یہ الزامات نہ صرف ہمارے مؤکل اور اس کی بیٹی کی ساکھ کو نقصان پہنچاتے ہیں، بلکہ اس کے وقار کو مجروح کرنے کی کوشش بھی ہیں۔"