پٹنہ،نئی دہلی: فوج میں بھرتی کے لیے مرکز کی طرف سے لائی گئی اگنی پتھ اسکیم کی ملک کی کئی ریاستوں میں مخالفت دیکھی جا رہی ہے۔ اس اسکیم کی سب سے زیادہ مخالفت بہار میں دیکھی گئی ہے۔

اگنی پتھ اسکیم کو لے کر بہار سے لے کر تلنگانہ تک مظاہرے جاری ہیں۔ اس احتجاج کا سب سے زیادہ اثر بہار میں دیکھا گیا ہے۔

اس کے ساتھ ہی بہار میں بی جے پی کی حلیف جماعت جے ڈی یو نے فوج میں چار سال سے شروع کی گئی اگنی پتھ اسکیم کے حوالے سے اس منصوبہ پر دوبارہ غور کرنے کا مطالبہ کیا ہے۔

جے ڈی (یو) کے سینئر لیڈر کے سی تیاگی نے کہا، "ہم اس اسکیم کو واپس لینے کے لیے نہیں کہہ رہے ہیں، لیکن نوجوانوں کے غصے کو دیکھتے ہوئے، ہم اس اسکیم پر دوبارہ نظر ڈالنے کا مطالبہ کر رہے ہیں۔"

کے سی تیاگی نے کہا، ''احتجاج کرنے والے نوجوانوں کے ساتھ بات چیت کی فوری ضرورت ہے۔ مسلح افواج کے ریٹائرڈ افسران، نوجوانوں کے نمائندوں اور حکومت کو مل بیٹھ کر اگنی پتھ اسکیم کا جائزہ لینے کے لیے بات کرنی چاہیے۔

ہم اسے واپس لینے کا نہیں کہہ رہے ہیں لیکن نوجوانوں کی ناراضگی کو دیکھتے ہوئے ہم اس اسکیم پر دوبارہ غور کرنے کا مطالبہ کر رہے ہیں۔

روزگار کے ماڈل کے سوال پر، کے سی تیاگی نے کہا، "اگر گاؤں خود مختار اور خود انحصار ہوتے تو لوگ گاؤں سے ہجرت نہیں کرتے۔

بہار میں زرعی پروسیسنگ کے شعبوں میں بے پناہ صلاحیت موجود ہے۔ آج ہم نوجوانوں میں غصہ دیکھ رہے ہیں کیونکہ ہم گاؤں اور چھوٹے شہروں میں روزگار پیدا کرنے کے قابل نہیں ہیں۔

بہار میں اگنی پتھ کے خلاف جاری احتجاج کے دوران کئی اضلاع میں بی جے پی کے دفاتر کو نشانہ بنایا گیا ہے۔ اس کے علاوہ بی جے پی ایم ایل اے کی رہائش گاہ پر بھی مظاہرین نے حملہ کیا ہے۔

اس پر بی جے پی اور جے ڈی یو کے درمیان زبانی جنگ تیز ہوگئی ہے۔ بہار بی جے پی کے سربراہ سنجے جیسوال نے پارٹی دفاتر پر حملے پر جے ڈی (یو) پر حملہ کیا اور اسے "سازش" قرار دیا کہ پولیس نے مظاہرین کو نہیں روکا۔

جیسوال نے کہا کہ مدھے پورہ میں 300 پولس اہلکار خاموش تماشائی بنے ہوئے ہیں، ان کے خلاف کیا کاروائی ہو رہی ہے۔ جے ڈی (یو) کے قومی صدر راجیو رنجن سنگھ عرف للن سنگھ نے جوابی حملہ کیا اور پوچھا کہ پولیس نے ان ریاستوں میں مظاہرین کے خلاف کارروائی کیوں نہیں کی جہاں وہ اقتدار میں ہیں۔

واضح ہوکہ جمعرات اور جمعہ کو مظاہرین نے نوادہ، مدھوبنی اور مدھے پورہ میں بی جے پی کے دفاتر پر حملہ کیا اور پارٹی لیڈر سنجے جیسوال، نائب وزیر اعلیٰ رینو دیوی اور ایم ایل اے سی این گپتا سمیت کئی لیڈروں کے گھروں کو نشانہ بنایا۔ بہار میں بی جے پی لیڈروں پر حملے کے بعد وزارت داخلہ نے سنجے جیسوال اور رینو دیوی سمیت بہار کے 10 بی جے پی ایم ایل ایز کو وائی زمرہ کی سیکورٹی فراہم کرنے کا فیصلہ کیا ہے۔