Alia Bhatt's appearance at Cannes 2026

کانز فلم فیسٹیول 2026 میں بالی ووڈ اداکارہ عالیہ بھٹ نے ایک بار پھر اپنے دلکش انداز اور شاندار فیشن سینس سے سب کی توجہ اپنی جانب کھینچ لی۔ ریڈ کارپٹ پر عالیہ کا بلاش پیچ رنگ کا حسین گاؤن اور ان کا سوفٹ گلیم لک سوشل میڈیا پر تیزی سے وائرل ہو رہا ہے۔

کانز 2026 کی افتتاحی تقریب کے لیے عالیہ نے معروف ڈیزائنر تمارا رالف کا تیار کردہ کسٹم کوچر گاؤن پہنا۔ ہلکے پیچ رنگ کے اس اسٹریپ لیس باڈی ہگنگ گاؤن میں اسکلپٹڈ سویٹ ہارٹ نیک لائن اور کارسیٹ اسٹائل باڈیس نے ان کے لک کو بے حد دلکش بنا دیا۔

گاؤن کی سب سے نمایاں خاصیت اس کے ساتھ جڑی ڈرامائی شیفون ڈریپنگ تھی، جو دونوں بازوؤں سے لہراتی ہوئی پیچھے تک جا رہی تھی۔ چلتے وقت یہ بہتا ہوا کپڑا نہایت حسین منظر پیش کر رہا تھا اور عالیہ کے پورے انداز کو کسی خوابناک پریوں کی کہانی جیسا احساس دے رہا تھا۔

عالیہ کے اس بین الاقوامی لک میں ایک خوبصورت ہندوستانی جھلک بھی نمایاں تھی۔ ان کے کندھوں پر لپٹی دوپٹے سے متاثر شیفون ڈریپ نے ان کے انداز میں روایتی ثقافت کی خوبصورتی شامل کر دی، جس نے ان کے فیشن اسٹیٹمنٹ کو مزید منفرد بنا دیا۔

اسٹائلسٹ ریا کپور کی جانب سے اسٹائل کی گئی عالیہ نے ایکسیسریز کو کم رکھتے ہوئے ایک شاندار اسٹیٹمنٹ نیکلس پہنا۔ یہ نیکلس ’شوپارڈ‘ کا تھا، جس میں 168.27 کیرٹ کا نایاب گلابی مونگا اور درمیان میں 5.53 کیرٹ کا قیمتی گولکنڈا ٹائپ 2ا ے ہیرا جڑا ہوا تھا۔

عالیہ کا میک اپ بھی ان کے لباس کی طرح نہایت نرم اور نفیس تھا۔ انہوں نے ڈیوئی اسکن، پیچ پنک بلش، ہلکے براؤن آئی شیڈو، سبٹل آئی لائنر اور گلوسی نیوڈ لپس کا انتخاب کیا۔ بالوں کو سینٹر پارٹنگ کے ساتھ نرم ویوز میں اسٹائل کیا گیا تھا، جو ان کے لک کو اولڈ ہالی ووڈ کی لازوال خوبصورتی عطا کر رہا تھا۔

عالیہ بھٹ کے اس ریڈ کارپٹ لک کو سوشل میڈیا پر زبردست پذیرائی ملی۔ فلم ساز کرن جوہر نے فائر ایموجی کے ساتھ اپنا ردِعمل دیا، جبکہ بپاشا باسو نے ہارٹ ایموجی پوسٹ کی۔ اداکارہ سوفی چودھری نے عالیہ کو “بیونڈ اسٹننگ” قرار دیا، جبکہ شوبھیتا دھولی پالا نے بھی ان کے فیشن سینس کی بھرپور تعریف کی۔

یہ عالیہ بھٹ کی کانز فلم فیسٹیول میں دوسری شرکت ہے۔ انہوں نے پہلی بار 2025 میں کانز میں ڈیبیو کیا تھا، جہاں ’گُچی‘ کی ساڑھی سے متاثر ڈریس پہن کر انہوں نے خوب سرخیاں بٹوری تھیں۔