یوکن کینیڈا:  ہفتے کی دوپہر یوکن اور الاسکا کی سرحد کے قریب سات اعشاریہ صفر کی شدت کا زلزلہ ریکارڈ کیا گیا جس کی اطلاع سی بی سی نے دی۔

سی بی سی کے مطابق ارتھ کوئیک کینیڈا نے الاسکا یوکن سرحد کے نزدیک سات اعشاریہ صفر شدت کا زلزلہ ریکارڈ کیا جس کی گہرائی پانچ کلومیٹر تھی۔

سی بی سی کے مطابق یوکن ہائی ویز اینڈ پبلک ورکس نے ایک سوشل میڈیا پوسٹ میں بتایا کہ ساؤتھ کلونڈائیک ہائی وے شام پانچ بجے سے چوبیس کلومیٹر سے ایک سو چھ کلومیٹر تک کے حصے میں بند رہے گی اور برفانی تودوں کے بڑھتے خدشات کے باعث رات بھر بند رہے گی۔ راستے کا صبح دوبارہ جائزہ لیا جائے گا اور تازہ ترین معلومات آن لائن فراہم کی جائیں گی۔

سی بی سی نے بتایا کہ ایڈون نیسن جو یونیورسٹی آف وکٹوریہ میں ارتھ اینڈ اوشن سائنسز کے پروفیسر ہیں انہوں نے کہا کہ اسی علاقے میں اٹھارہ سو ننانوے انیس سو اناسی دو ہزار دو اور دو ہزار سترہ میں بھی زلزلے ریکارڈ کیے گئے تھے۔

سی بی سی کے مطابق اب تک کسی قسم کے جانی نقصان یا تباہی کی اطلاع نہیں ملی۔