اسلام آباد: پاکستان کی وفاقی کابینہ نے فیڈرل کونسٹی ٹیوشنل کورٹ (پروسیجر اینڈ پریکٹس) ایکٹ 2025 کے مسودے کی منظوری دے دی، جبکہ پاکستان آرمی ایکٹ، پاکستان ایئر فورس ایکٹ اور پاکستان نیوی ایکٹ میں مجوزہ ترامیم بھی منظور کرلی گئیں۔

وزیراعظم محمد شہباز شریف کی زیرِ صدارت اجلاس میں ستائیسویں آئینی ترمیم کے مطابق متعلقہ قوانین کو ہم آہنگ کرنے کے اہم فیصلے کیے گئے۔ ادھر قومی اسمبلی نے پاکستان آرمی ترمیمی بل 2025، پاکستان ایئر فورس ترمیمی بل 2025 اور پاکستان نیوی ترمیمی بل 2025 کی منظوری دے دی، تاہم اپوزیشن نے ان بلز کی مخالفت کی۔

مجوزہ آرمی ایکٹ کے مطابق آرمی چیف کے لیے بطور چیف آف ڈیفنس فورسز نیا نوٹیفکیشن جاری کیا جائے گا جس کے بعد ان کی مدتِ ملازمت اس نئے عہدے کے تحت دوبارہ سے شروع ہوگی۔ وزیراعظم، آرمی چیف/چیف آف ڈیفنس فورسز کی سفارش پر کمانڈر نیشنل اسٹریٹجک کمانڈ تعینات کریں گے، جس کی مدتِ ملازمت تین سال مقرر ہوگی اور اسے مزید تین سال کے لیے بڑھایا بھی جا سکے گا۔

قومی اسمبلی میں وضاحتی بیان دیتے ہوئے وفاقی وزیر قانون اعظم نذیر تارڑ نے بتایا کہ آرمی ایکٹ کی منظوری کے بعد آرمی چیف کا عہدہ تبدیل ہو کر چیف آف ڈیفنس فورسز بن گیا ہے، جس کی مدت اب پانچ سال ہوگی اور تعیناتی کی تاریخ سے شمار کی جائے گی۔ انہوں نے مزید بتایا کہ چیئرمین جوائنٹ چیفس آف اسٹاف کمیٹی کا عہدہ ختم کر دیا گیا ہے، تاہم موجودہ چیئرمین اپنی ریٹائرمنٹ تک اپنے منصب پر برقرار رہیں گے۔

ترمیمی ایکٹ میں کہا گیا ہے کہ آرمی چیف/چیف آف ڈیفنس فورسز پاک فوج کے تمام شعبوں کی ری اسٹرکچرنگ اور انضمام کے ذمہ دار ہوں گے، جبکہ مجوزہ قانون کے مطابق 27 نومبر سے چیئرمین جوائنٹ چیفس آف اسٹاف کمیٹی کا عہدہ باضابطہ طور پر ختم ہو جائے گا۔