کینیڈا میںپراسرار موت کا شکار ہونے والی بلوچ سیاسی رہنما کریمہ بلوچ کی جسد خاکی کو پاکستان پہنچنے پر پہلے پاکستانی فوج نے اپنے قبضے میں لے لیا تھا ۔ اب ان کی لاش پاکستان کے صوبہ بلوچستان میں اُن کے آبائی علاقے تمپ پہنچ چکی ہے ،مگر ان کی تدفین سے قبل یہ خبر بھی ملی ہے کہ ان کے جنازے میں شرکت سے لوگوں کو روکنے کی کوشش کی گئی۔ان کی جسد خاکی کے ساتھ چل رہی گاڑیوں کو پولیس نے ایک مقام سے آگے نہیں جانے دیا۔ تربت بلوچستان کے ضلع کیچ میں واقع ہے۔ ان کی بہن کے مطابق تدفین کریمہ کی وصیت کے مطابق کی جا رہی ہے۔کریمہ کی موت گذشتہ دسمبر کینیڈا میں واقع ہوئی تھی اور ٹورنٹو پولیس نے ان کی ہلاکت کے پیچھے کسی جرم کے امکان کو مسترد کیا تھا۔تاہم خاندان کے افراد نے یہ تسلیم کرنے سے انکار کرتے ہوئے تحقیقات کا مطالبہ کیا تھا۔ان کی بہن ماہ گنج بلوچ کے مطابق کریمہ کی میت پاکستان پہنچی تھی لیکن حکام نے چار گھنٹے کی تاخیر کے بعد اسے خاندان کے حوالے کیا۔