اسلام آباد : پاکستان میں سیاسی بھونچال آیا ہوا ہے ،جس میں عمران خان کی حکومت ہچکولے کھا رہی ہے اور اگلے چند دنوں میں زمین بوس ہونے کا امکان ہے۔ پاکستان کے وزیراعظم عمران خان کی سابقہ اہلیہ ریحام خان نے موجودہ ملکی سیاسی صورتحال پر دلچسپ انداز میں تبصرہ کیا ہے۔ ریحام خان نے ٹوئٹر پر بیان جاری کرتے ہوئے کہا کہ ' تبدیلی سرکار کا پیٹرول ختم ہوگیا'۔

واضح رہے کہ ریحام عمران خان کی حکومت اور ان کی پالیسوں پر اکثر تنقید کرتی ہوئی نظر آتی ہیں ۔ خیال رہے کہ وفاق میں پاکستان تحریک انصاف کی اتحادی جماعت متحدہ قومی موومنٹ (ایم کیو ایم) پاکستان نے عمران خان کا ساتھ چھوڑ کر تحریک عدم اعتماد پر اپوزیشن کا ساتھ دینے کا باضابطہ اعلان کردیا۔

تبدیلی سرکار کا پٹرول ختم ہو گیا.

— Reham Khan (@RehamKhan1) March 30, 2022

متحدہ اپوزیشن اور ایم کیو ایم کے درمیان معاملات طے پانے کے بعد وزیر اعظم عمران خان کی حکومت نے بظاہر قومی اسمبلی میں اکثریت کھو دی ہے، حکومت کے قومی اسمبلی میں نمبر 164 رہ گئے جبکہ متحدہ اپوزیشن کے نمبرز 177 تک پہنچ گئے ہیں۔ وزیراعظم عمران خان کیخلاف تحریک عدم اعتماد پر قومی اسمبلی میں بحث کا آغاز 31 مارچ سے ہوگا اور کسی بھی وقت اس پر ووٹنگ ہوسکتی ہے۔