لندن،: بی بی سی نے کہا ہے کہ اس نے امریکی صدر ڈونالڈ ٹرمپ سے پانوراما کی اُس قسط پر معذرت کر لی ہے جس میں ان کی 6 جنوری 2021 کی تقریر کے حصوں کو جوڑ کر پیش کیا گیا تھا، تاہم ادارے نے ٹرمپ کے ہرجانے کے مطالبے کو مسترد کر دیا ہے۔

ادارے نے کہا کہ ایڈیٹنگ سے یہ "غلط تاثر" گیا کہ ٹرمپ نے براہِ راست تشدد پر اکسانے کی بات کی تھی، اور اسے فیصلہ کیا گیا ہے کہ 2024 میں نشر ہونے والا وہ پروگرام دوبارہ نہیں دکھایا جائے گا۔ٹرمپ نے دھمکی دی تھی کہ اگر بی بی سی اکتوبر 2024 کی دستاویزی فلم واپس نہ لے، معافی نہ مانگے اور انہیں معاوضہ نہ دے تو وہ ایک ارب ڈالر کا مقدمہ کریں گے۔

اس معاملے کے بعد بی بی سی کے ڈائریکٹر جنرل ٹِم ڈیوی اور ہیڈ آف نیوز ڈیبرہ ٹرنَس نے استعفیٰ دے دیا۔معافی جاری ہونے سے چند گھنٹے قبل 2022 کی نیوزنائٹ نشریات کی ایک اور غلط ایڈیٹنگ بھی سامنے آئی، جس سے معاملہ مزید سنگین ہو گیا۔

سی این این کی ایک رپورٹ کے مطابق بی بی سی کے ترجمان نے بتایا کہ ادارے کے وکلا نے ٹرمپ کی قانونی ٹیم کو جواب بھیج دیا ہے۔

ترجمان نے کہا، "بی بی سی کے چیئرمین سمیر شاہ نے وائٹ ہاؤس کو الگ سے خط لکھ کر صدر ٹرمپ کو واضح کیا ہے کہ 6 جنوری 2021 کی تقریر کی ایڈیٹنگ پر وہ اور ادارہ معذرت خواہ ہیں۔"

ترجمان کے مطابق بی بی سی کے پاس اس دستاویزی فلم کو دوبارہ نشر کرنے کا کوئی ارادہ نہیں، تاہم ادارے نے اسے ہتکِ عزت قرار دینے کے دعوے سے انکار کیا ہے۔

بی بی سی پہلے ہی تسلیم کر چکا تھا کہ “Trump: A Second Chance?” نامی اس دستاویزی فلم میں فیصلہ سازی میں ’’غلطی‘‘ ہوئی، جو 2024 کے صدارتی انتخاب سے کچھ دن پہلے نشر ہوئی تھی—وہ انتخاب ٹرمپ نے جیتا۔

دستاویزی فلم میں ٹرمپ کی 6 جنوری کی تقریر کے تین مختلف اقتباسات کو ایک ساتھ جوڑا گیا تھا، حالانکہ اصل تقریر کے وہ حصے تقریباً ایک گھنٹے کے وقفے سے دیے گئے تھے۔

ناقدین نے کہا کہ اس ایڈیٹنگ سے یہ تاثر ملا کہ ٹرمپ نے ایک ہی جملے میں اپنے حامیوں کو ’’میرے ساتھ مارچ کرو‘‘ اور ’’جان کی بازی لگا دو‘‘ جیسے الفاظ کہے، جبکہ اصل تقریر میں وہ جگہ بھی کاٹ دی گئی جہاں ٹرمپ نے پُرامن احتجاج کی بات کی تھی۔

ٹرمپ کی تقریر کے بعد ہزاروں حامیوں نے کیپیٹل ہِل کا رخ کیا اور عمارت میں داخل ہو کر 2020 کے انتخابی نتائج کی توثیق کو روکنے کی کوشش کی—جس انتخاب میں ٹرمپ ہار گئے تھے۔

فاکس نیوز کو انٹرویو میں ٹرمپ نے کہا کہ بی بی سی نے ان کی ’’خوبصورت‘‘ اور ’’پُرسکون‘‘ تقریر کو ’’تباہ‘‘ کر دیا اور اسے ’’شدت پسند‘‘ انداز میں پیش کیا۔

انہوں نے اپنی جنوری 2021 کی تقریر کو ’’بہترین‘‘ اور ’’مکمل‘‘ قرار دیتے ہوئے پہلے بھی ٹروتھ سوشل پر اسے ’’جمہوریت کے لیے خوفناک کام‘‘ کہا تھا۔ٹرمپ نے مزید کہا کہ بی بی سی کے بڑے لوگ، بشمول ٹِم ڈیوی، سب مستعفی ہو رہے ہیں/نکالے جا رہے ہیں کیونکہ وہ میری بہت اچھی (مکمل!) تقریر میں ردوبدل کرتے پکڑے گئے۔ یہ بہت بےایمان لوگ ہیں جنہوں نے صدارتی انتخاب پر اثر انداز ہونے کی کوشش کی۔ اور یہ سب ایک ایسے ملک کے صحافی ہیں جسے ہمارا سب سے قریبی اتحادی کہا جاتا ہے۔ جمہوریت کے لیے یہ کتنا برا کام ہے!‘‘