ڈھاکہ/ آواز دی وائس

بنگلہ دیش کی عبوری حکومت کے نیشنل سیکیورٹی ایڈوائزر (این ایس اے) خلیل الرحمان 19 نومبر کو دہلی کا دورہ کر رہے ہیں، جہاں وہ انڈین اوشن ریجن نیشنل سیکیورٹی ایڈوائزرز کانفرنس میں شرکت کریں گے۔ اس بات کی اطلاع بنگلہ دیش کے روزنامہ پرتھم آلو نے دی۔ کولمبو سکیورٹی کنکلیو  جو بحر ہند کے پانچ ممالک کا ایک مشترکہ فورم ہے  20 نومبر کو دہلی میں منعقد ہوگا۔ رپورٹ کے مطابق، ہندوستان کے قومی سلامتی کے مشیر اجیت ڈوبھال نے خلیل الرحمان کو اس اجلاس میں شرکت کی دعوت دی ہے۔

اگرچہ اس دورے کی تفصیلات ابھی سامنے نہیں آئی ہیں، لیکن بنگلہ دیش کے آئندہ قومی انتخابات کے تناظر میں اسے نہایت اہم قرار دیا جا رہا ہے۔ بنگلہ دیش کی عبوری حکومت کے چیف ایڈوائزر محمد یونس نے جمعرات کو اعلان کیا کہ قومی انتخابات اور جولائی چارٹر پر ریفرنڈم — جو تحریک کے بعد اصلاحات کی تجویز ہے — ایک ہی دن منعقد کیے جائیں گے، تاکہ سیاسی بحران کے حل کے لیے حکومت کی کوششوں کو تقویت مل سکے۔ قوم سے خطاب میں چیف ایڈوائزر نے بتایا کہ یہ فیصلہ آج مشیروں کی کونسل کے اجلاس میں منظور کیا گیا، اور اسے جولائی 2024 کی عوامی بغاوت کے بعد بنائی گئی اصلاحاتی روڈ میپ کے نفاذ کی سمت ایک بڑا قدم قرار دیا۔

یونس نے اپنے خطاب میں کہا کہ تمام پہلوؤں پر غور کرنے کے بعد ہم نے فیصلہ کیا ہے کہ ریفرنڈم آئندہ قومی پارلیمانی انتخابات کے دن ہی منعقد ہوگا۔ اس کا مطلب یہ ہے کہ قومی انتخابات کی طرح ریفرنڈم بھی فروری کے پہلے حصے میں اسی دن کرایا جائے گا۔ جولائی نیشنل چارٹر نیشنل کنسنسس کمیشن نے کئی ماہ تک سیاسی جماعتوں اور سول سوسائٹی سے مشاورت کے بعد تیار کیا تھا۔ اس چارٹر میں آئینی اور انتظامی اصلاحات کا ایک فریم ورک پیش کیا گیا ہے، جس کا مقصد بنگلہ دیش میں جمہوریت، جوابدہی اور حکمرانی کو مضبوط کرنا ہے  خصوصاً اُس طالب علم تحریک کے بعد جس نے 2024 میں سابق وزیراعظم شیخ حسینہ کو اقتدار سے بے دخل کیا، جس کے بعد انہیں ملک چھوڑنا پڑا۔

جولائی 2024 میں ایک طالب علم قیادت والی تحریک نے شیخ حسینہ کی حکومت ختم کر دی تھی۔ بعد ازاں 5 اگست 2024 کو سابق وزیراعظم ہندوستان فرار ہوگئیں، اور پھر محمد یونس کی قیادت میں ایک عبوری حکومت قائم کی گئی۔