ٹی ٹوئنٹی ورلڈ کپ  میں فائنل سے قبل کے لیے اسٹیج تیار ہے۔ نہ صرف ہندوستان اور پاکستان بلکہ دنیا دانتوں تلے انگلیاں دبانے کے لیے بے چین ہے۔دلوں کی دھڑکنیں تیزہوگئی ہیں ۔یہ میچ ہی ایسا ہوتا ہے جس میں کمزور دل حصہ نہیں بن پاتے ہیں۔کیونکہ یہ اعصاب شکن میچ ہوتا ہے۔کھلاڑیوں کے ساتھ ساتھ مداحوں کے تیور بھی بدل جاتے ہیں ۔ ایک طویل عرصے کے بعد دونوں روایتی حریف آمنے سامنے ہیں اور سب کی نگاہیں اتوار 24 اکتوبر کو دبئی میں اس شاہی جنگ پر مرکوز ہیں ۔۔

ہندوستان اور پاکستان کے درمیان میچ کو کرکٹ کی دنیا میں سب سے بڑا مقابلہ مانا جاتا ہے۔

ان دونوں ممالک کے درمیان کرکٹ کے تینوں فارمیٹس میں ہونے والے پہلے مقابلوں کی تاریخ کیا رہی ہے اس پر ایک نظر ڈالتے ہیں۔

 ہندوستان۔ پاکستان : پہلا ٹیسٹ

ہندوستان اور پاکستان کے درمیان پہلا کرکٹ ٹیسٹ تقسیم ہند کے پانچ سال بعد 1952 میں اکتوبر کی 16 سے 18 تاریخ کے درمیان کھیلا گیا۔

یہ پاکستان کا بھی پہلا ٹیسٹ تھا۔ نئی دہلی کے فیروز شاہ کوٹلہ گراؤنڈ میں کھیلے جانے والے اس میچ میں پاکستانی ٹیم کو عبدالحفیظ کاردار اور امیر الہی جیسے کھلاڑیوں کی خدمات حاصل تھیں جو اس سے قبل ہندوستان کی ٹیم سے بھی کھیل چکے تھے۔

ہندوستان نے ٹاس جیت کر پہلے بیٹنگ کا فیصلہ کیا اور 382 کا رنز مجموعہ بورڈ پر سجا دیا۔ ہندوستان کے ہیمو ادھیکاری نے 81 رنز بنائے جب کہ لاسٹ مین آنے والے غلام احمد نے دسویں وکٹ کے لیے 109 رنز کی شراکت میں 50 رنز بنا ڈالے۔

جواب میں پاکستان کے لیجینڈری اوپنر حنیف محمد نے 51 رنز کی اننگز کھیلی اور پویلین کو چل دیے۔ پاکستان کی پوری ٹیم 150 رنز بنا سکی اور ہندوستان کے بائیں ہاتھ سے بولنگ کرنے والے وینو منکڈ نے 52 رنز کے عوض آٹھ کھلاڑیوں کو چلتا کیا۔

 فالو آن کرتی پاکستانی ٹیم کو ایک بار پھر منکڈ کا سامنا کرتے ہوئے پانچ وکٹیں کھونا پڑیں اور پوری ٹیم ہی 150 رنز بنا کر آؤٹ ہو گئی۔

ہندوستان نے اس میچ میں ایک اننگز اور 70 رنز سے فتح حاصل کی۔

 ہندوستان ۔ پاکستان پہلا ایک روزہ میچ

دونوں ٹیموں کے مابین پہلا ایک روزہ میچ یکم اکتوبر 1978 کو کھیلا گیا۔ اس میچ سے قبل کھیلی جانے والی ٹیسٹ سیریز میں پاکستان نے 0-2 سے کامیابی حاصل کی تھی۔ جس کے بعد دونوں ٹیموں کے درمیان تین ایک روزہ میچز کی پہلی سیریز کھیلی گئی۔

اس سیریز کا پہلا میچ کوئٹہ میں کھیلا گیا تھا۔ یہ میچ ہندوستان کے معروف کھلاڑی کپل دیو کا بھی پہلا میچ تھا۔ ہندوستان نے پہلے بیٹنگ کرتے ہوئے 40 اوورز میں سات وکٹوں کے نقصان پر 170 رنز بنائے۔ مہندر امرناتھ 51 رنز کے ساتھ ٹاپ سکورر رہے۔

 جواب میں پاکستانی ٹیم کا آغاز پر اعتماد تھا اور 82 رنز پر صرف ایک وکٹ کھونے کے باوجود پوری ٹیم 166 رنز پر آٹھ وکٹیں گوا بیٹھی۔ پاکستان کو اس میچ میں بھی شکست کا منہ دیکھنا پڑا۔

 پاکستانی اننگز کی خاص بات ماجد خان کی نصف سینچری تھی۔

 سیریز کا دوسرا میچ سیالکوٹ میں کھیلا گیا جس میں پاکستان نے آٹھ وکٹوں سے فتح حاصل کرتے ہوئے سیریز برابر کر دی۔ سیریز کا تیسرا میچ جو ساہیوال میں کھیلا گیا وہ تنازعے کا شکار ہو گیا۔

 ہندوستان ۔ پاکستان کے درمیان پہلا ٹی ٹوئنٹی

 دونوں حریف ملک ٹی ٹوئنٹی میں پہلی بار 14 ستمبر 2007 کو جنوبی افریقہ کے شہر ڈربن میں سامنے آئے۔

 یہ گروپ میچ اس وقت ٹائی ہو گیا جب دونوں ٹیمیں مقررہ اوورز میں 141 رنز بنا سکیں۔ جس کے بعد ’بول آؤٹ‘ کے ذریعے اس میچ کے فاتح کا فیصلہ کیا جانا تھا۔

 اس میچ میں پاکستان کے محمد آصف نے 18 رنز کے عوض چار کھلاڑیوں کو آؤٹ کیا۔ جس کے بعد پاکستان کی اگلے راؤنڈ تک رسائی یقینی ہو گئی لیکن پاکستان بلے باز مصباح الحق جو 53 رنز پر کھیل رہے تھے آخری گیند پر آؤٹ ہو گئے۔

بول آؤٹ کے مرحلے میں وریندر سہواگ، ہربھجن سنگھ، روبن اتھاپا تینوں نے کامیابی سے وکٹوں کا نشانہ لیا لیکن پاکستان کے یاسرعرفات، عمر گل اور شاہد آفریدی اپنے ہدف کا نشانہ لگانے میں ناکام رہے۔

دونوں ٹیموں کے درمیان اگلا مقابلہ اسی ٹورنامنٹ کے فائنل میں جنوبی افریقہ کے شہر جوہانسبرگ میں ہوا جس میں بھارت کو پانچ رنز سے فتح ہوئی۔