ٹوکیو
کورونا کے تباہ کن اثرات دنیا بھر میں نہ صرف معیشت کی زبوں حالی کی صورت نظر آتے ہیں بلکہ اس مہلک وائرس نے معاشرتی اور نفسیاتی پیچیدگیوں کے ساتھ تفریحی تقاریب کا بھی بیڑا غرق کیا ہے۔ سیاحت اور سینما کے بعد اس فہرست میں اب اقوام عالم کو جوڑنے والے پروگرام اولمپکس کی تقاریب بھی شامل ہو گئیں ہیں۔
جاپان نے کورونا وائرس کے خدشے کے پیش نظر رواں سال منعقد ہونے والے ٹوکیو اولمپکس اور پیرالمپکس میں غیر ملکی شائقین کی شرکت پر پابندی عائد کردی ہے۔ اولمپکس منتظمین کےبیان میں انکشاف کیا گیا ہے کہ بیرون ملک رہنے والے ٹکٹ ہولڈرز کی وضاحت کےلئےجاپانی حکام اس نتیجے پر پہنچے ہیں کہ بین الاقوامی شائقین اولمپکس اور پیرالمپکس کے موقع پر جاپان میں داخل نہیں ہو سکیں گے۔
بیان میں کہا گیا کہ انٹرنیشنل اولمپکس کمیٹی اور انٹرنیشنل پیرالمپکس کمیٹی جاپان کے اس فیصلے کا مکمل احترام کرتے ہوئے اسے تسلیم کرتی ہے۔ جاپانی حکام نے اولمپک اور پیرالمپک کمیٹیوں کو بتایا کہ غیر ملکی شائقین کے ملک میں داخلے کی یقین دہانی کرانا انتہائی مشکل ہے۔ گزشتہ سال شیڈول اولمپکس کو ایک سال ملتوی کردیا گیا تھا اور اب گیمز کا انعقاد 23 جولائی سے ٹوکیو میں کیا جا رہا ہے جبکہ اس کے ایک ماہ بعد 24 اگست سے پیرالمپکس منعقد ہوں گے۔
منتظمین نے کہا کہ جاپان اور دنیا کے دیگر ممالک میں کووڈ-19 کی چیلنجنگ صورتحال، سفری پابندیوں اور وائرس کی نئی طرز کے پھیلاؤ کی وجہ سے ہم یہ فیصلہ لینے پر مجبور ہوئے اور جن لوگوں نے ٹکٹ خرید لیے تھے انہیں رقم واپس کردی جائے گی۔ انٹرنیشنل اولمپکس کمیٹی کے سربراہ تھامس باک نے کہا ہے کہ غیر ملکی شائقین کی شرکت پر پابندی کھیل کے مداحوں کی ایک عظیم قربانی کے طور پر یاد رکھی جائے گی ۔