ثاقب سلیم، نئی دہلی

چند روز قبل جب ملک کے صدر رام ناتھ کووند نے پدم ایوارڈز پیش کیے تو سوشل میڈیا پر یہ دعویٰ کیا گیا کہ مودی کی قیادت والی بھارتیہ جنتا پارٹی (بی جے پی) حکومت نے پہلے کے ایلیٹ ایوارڈ کو عام لوگوں کے لیے ایوارڈ میں تبدیل کر دیا ہے۔

یہ دلیل دی جاتی ہے کہ ایوارڈ یافتہ جیسے تلسی گوڑا، محمد شریف، بھوری بائی اور دیگر ان لوگوں کی نمائندگی کرتے ہیں جنہوں نے نچلی سطح پر ہندوستانیوں کے درمیان کام کیا۔

یہ دعویٰ کیا جاتا ہے کہ اس سے قبل یہ ایوارڈ زیادہ تر ان چند لوگوں کو دیا جاتا تھا جن کی لوٹین دہلی کے مخصوص حلقوں تک رسائی تھی اور دیگر مستحق ہندوستانیوں کو نظر انداز کیا جاتا تھا۔

اس دعوے نے مجھے اس کی حقیقت جانے کے لیے متجسس کر دیا۔  ایک ہندوستانی مسلمان ہونے کے ناطے، میری بنیادی دلچسپی یہ سمجھنا تھی کہ گزشتہ برسوں میں پدم ایوارڈز میں مسلمانوں کی نمائندگی کس طرح کی گئی ہے اور کیا موجودہ حکومت کے ساتھ رویہ میں کوئی تبدیلی آئی ہے۔

اس کے لیے میں نے 1954 سے لے کر اب تک تمام پدم ایوارڈ یافتہ افراد کی فہرست کی طرف رجوع کیا، جب پہلا پدم ایوارڈ پیش کیا گیا تھا۔ مجموعی طور پر 4,827 لوگوں کو ایوارڈز سے نوازا گیا ہے۔ جیسا کہ توقع کی جاتی ہے، ان ایوارڈز میں مسلمانوں کی نمائندگی کم ہے۔ تقریباً 14% آبادی کے ساتھ، کل ایوارڈز کا صرف 7.50% مسلمانوں کو ملا، جن میں سے کچھ غیر ہندوستانی شہری بھی تھے۔

دلچسپ بات یہ ہے کہ اگر ہم 2020 اور 2021 کے ایوارڈ جیتنے والوں کی فہرست لیں، جو کچھ دن پہلے پیش کی گئی تھی، تو اس تناسب میں مثبت اضافہ ہوا ہے۔ ان دو سالوں میں کل 260 پدم ایوارڈز میں سے 24 مسلمانوں کو پیش کیے گئے، جو کل ایوارڈز کا 9.23 فیصد ہے۔

پدم وبھوشن

پدم وبھوشن ایوارڈ یہ ایوارڈ بھارت رتن کے بعد دوسرا سب سے بڑا شہری اعزاز ہے اور یہ غیر معمولی اور ممتاز خدمات کے لیے دیا جاتا ہے۔ جب بحث گورننس یا سیاسی قیادت کے تقابل سے شروع ہوتی ہے تو میں نے حکمرانی کے معاملے میں مسلمانوں کی نمائندگی کا موازنہ کرنے کی بھی کوشش کی ہے۔

پہلا پدم وبھوشن 1954 میں دیا گیا تھا اور اب تک 321 لوگوں کو اس اعزاز سے نوازا جا چکا ہے۔ اگر ہم ان ایوارڈز کو حکومت کے مطابق تقسیم کریں، تو ہمیں پتہ چلتا ہے کہ پی وی نرسمہا راؤ کی قیادت والی کانگریس حکومت اور 1997-98 کی جنتا دل حکومتوں کے دوران مسلمانوں کی کارکردگی خراب تھی۔

سنہ 1992-98 کے عرصے میں کل 14 پدم وبھوشنوں میں سے کوئی بھی مسلمان یہ حاصل نہیں کر سکا۔ دلچسپ بات یہ ہے کہ 9 سالوں میں جب جواہر لعل نہرو وزیر اعظم تھے صرف 2 مسلمانوں کو یہ ایوارڈ دیا گیا۔ ان میں سے ایک ذاکر حسین تھے جنہیں بعد میں بھارت رتن سے نوازا گیا۔

اندرا گاندھی نے بطور وزیر اعظم اپنی دو میعادوں میں 14 سال ایوارڈ کی تقریب دیکھی۔ اس دوران 7 مسلمانوں کو پدم وبھوشن سے نوازا گیا جبکہ کل 73 کو یہ اعزاز ملا۔

منموہن سنگھ کی قیادت والی یو پی اے حکومت کے دس سالوں میں 6 مسلمانوں کو یہ ایوارڈ ملا ہے جب کہ نریندر مودی کی قیادت والی بی جے پی حکومت کے 7 سالوں میں 5 مسلمانوں کو یہ ایوارڈ ملا ہے۔راجیو گاندھی کے دورِ حکومت میں 13.33 فیصد مسلمانوں کو پدم وبھوشن ایوارڈ دیا گیا تو وہیں نریندر مودی کے دورحکومت میں 10.64فیصد پدم ایوارڈ مسلمانوں کو دیئے گئے۔

پدم بھوشن

پدم بھوشن ایک اعلیٰ درجہ کی ممتاز خدمات کے لیے دیا جاتا ہے۔ اب تک 1281 افراد کو اس ایوارڈ سے نوازا جا چکا ہے جن میں سے 95 مسلمان ہیں۔ یہ تقریباً 7.42فیصدہے جو کہ مسلم آبادی کے تناسب سے بہت کم ہے۔ پدم وبھوشن کی طرح 1997 اور 1998 میں کسی مسلمان کو پدم بھوشن سے نوازا نہیں گیا۔ 1954-63 کے دوران نہرو کے دور میں 14 مسلمانوں کو اعزاز سے نوازا گیا۔

اسی عرصے کے دوران کل 156 افراد کو اعزاز سے نوازا گیا۔ موجودہ حکومت کے پہلے پانچ سالوں میں مسلم حصہ داری بہت مایوس کن تھی جب انہیں صرف ایک ایوارڈ ملا، لیکن پچھلے دو سال میں 4 مسلمانوں کو پدم بھوشن سے نوازا جا چکا ہے۔ 2020 اور 2021 میں کل 26 ایوارڈز میں سے، یہ تعداد ایوارڈ جیتنے والوں کا 15.38فیصد ہے۔

پدم شری

پدم شری ممتاز خدمات کے لیے دیا جاتا ہے اور 3,225 لوگوں کو اس ایوارڈ سے نوازا گیا ہے۔ پہلے 9 ایڈیشنز میں 187 ایوارڈ جیتنے والوں میں سے صرف 9 مسلمان ہیں۔ 1966 سے 1983 کے عرصے میں مسلمانوں کی نمائندگی میں اضافہ دیکھا گیا جب 775 وصول کنندگان میں سے 62 مسلمان تھے۔

یہ مسلم تناسب 9.29 فیصد تھا۔ اگلے پانچ سالوں کے دوران، مزید 23 مسلمانوں کو نوازا گیا، جو کل ایوارڈز کا 10.70 فیصد بنتا ہے۔ اگلی دہائی میں، 90 کی دہائی میں نمائندگی گھٹ کر 5فیصد سے بھی کم رہ گئی اور بہت کم مسلمانوں کو پدم شری ملا۔

آخری دو ایڈیشن، 2020 اور 2021 میں، ایوارڈ میں مسلمانوں کی نمائندگی میں مثبت اضافہ دیکھا گیا، جب وصول کنندگان میں سے 8.64فیصد مسلمان تھے۔ اگرچہ آبادی کے تناسب سے اب بھی پیچھے ہے، لیکن یہ مثبت رجحان ہمیں امید دیتا ہے۔

اعداد و شمار صرف ایک بڑی تصویر کی نمائندگی کرتے ہیں۔باریکی سے جائزہ لینے پر پتہ چلتا ہے کہ پدم ایوارڈز کے لیے نامزدگی کی بدلی ہوئی پالیسی کا نتیجہ نکلا ہے۔ 2017 میں، حکومت نے عام ہندوستانیوں کے لیے نامزدگی کو کھول دیا۔ اس سے پہلے وزراء اور حکومت کے ارکان نامزدگی کرتے تھے اور وزیر اعظم کی سربراہی میں ایک کمیٹی ایوارڈ حاصل کرنے والوں کا انتخاب کرتی تھی۔

حکومت کی طرف سے چلائی جانے والی سوشل میڈیا مہموں نے لوگوں کی حوصلہ افزائی کی کہ وہ اپنے جاننے والے لوگوں کو نامزد کریں۔ اس سے پہلے شہرت یافتہ افراد یا جانے پہچانے وزراء کو خود بخود نامزد کیا جاتا تھا۔لیکن اب تبدیلی دیکھی جا سکتی ہے۔ نچلی سطح پر کام کرنے والے افراد کو لوگوں نے نامزد کیا اور ایوارڈز حاصل کیے۔

اس کے نتیجے میں ہم علی مانک فان، عبدالغفور کھتری، محمد شریف اور شہاب الدین راٹھوڑجیسے لوگوں کو پدم ایوارڈز حاصل کرتے ہوئے دیکھتے ہیں۔ اس حقیقت کے علاوہ کہ ان ایوارڈز میں مسلمانوں کی نمائندگی میں مثبت اضافہ ہوا ہے، ایوارڈز مزید جامع ہو گئے ہیں۔

نچلی ذاتوں اور پسماندہ علاقوں کے پس منظر سے تعلق رکھنے والے مسلمانوں کا احترام کیا جا رہا ہے۔ سوشل میڈیا پر عا م لوگوں اور پسماندہ لوگوں کی بڑی شرکت نے اس بات کو یقینی بنایا ہے کہ ان کے درمیان کام کرنے والوں اور ان کے ساتھ کام کرنے والوں کو پہچانا جائے۔