نئی دہلی. محکمہ موسمیات (آئی ایم ڈی) نے بنگلورو میں اگلے دو دن یعنی منگل کی صبح تک بڑے پیمانے پر بارش کی پیش گوئی کی ہے۔ محکمہ کا کہنا ہے کہ اگلے دو دنوں تک کرناٹک، کیرالہ، مہاراشٹر، تمل ناڈو، پڈوچیری اور کرائیکل میں کئی مقامات پر ہلکی سے درمیانی بارش ہوگی۔

تمل ناڈو، پڈوچیری، کرائیکل، کیرالہ اور مہاراشٹر کے الگ الگ مقامات پر بھی موسلادھار بارش کی بھی توقع ہے۔ یہی نہیں تلنگانہ میں بعض مقامات پر ہلکی سے درمیانی بارش کا امکان ہے۔

آندھرا پردیش کے کئی علاقوں میں موسلادھار بارش ہوئی ہے جس کی وجہ سے ایک عمارت گرنے سے چار افراد ہلاک ہو گئے ہیں۔ محکمہ موسمیات نے اپنے آل انڈیا ویدر بلیٹن میں کہا ہے کہ جنوبی کرناٹک، شمالی تمل ناڈو اور ملحقہ حصوں پر کم دباؤ کا علاقہ برقرار ہے، جو بتدریج کم ہو جائے گا۔

محکمہ کے مطابق اگلے 24 گھنٹوں کے دوران مشرقی وسطی بحیرہ عرب میں تیز ہواؤں کی رفتار 40-50 کلومیٹر فی گھنٹہ سے 60 کلومیٹر فی گھنٹہ تک چلنے کا امکان ہے۔ اسی عرصے کے دوران خطے میں سمندر کی صورتحال انتہائی خراب رہے گی۔

اس کے زیر اثر اگلے پانچ دنوں کے دوران کرناٹک کے ساحلی علاقوں میں بھاری سے بہت زیادہ بارش کی توقع ہے۔ محکمہ موسمیات کے مطابق اگلے دو دنوں کے دوران جنوبی اندرونی کرناٹک میں بھاری سے بہت بھاری بارش ہوسکتی ہے۔

اگلے 24 گھنٹوں کے دوران ساحلی اور جنوبی کرناٹک میں بھاری سے بہت زیادہ بارش کا امکان ہے۔

دوسری جانب موسم کی پیش گوئی کرنے والے نجی ادارے اسکائی میٹ ویدر کی رپورٹ کے مطابق آئندہ 24 گھنٹوں کے دوران تامل ناڈو اور رائل سیما کے کچھ حصوں میں ایک یا دو مقامات پر ہلکی بارش کے ساتھ موسلادھار بارش ہوسکتی ہے۔

یہی نہیں کیرالہ اور ساحلی آندھرا پردیش کے کچھ حصوں میں بھی بارش کی پیش قیاسی کی گئی ہے۔ کونکن اور گوا، انڈمان اور نکوبار جزائر، جنوبی چھتیس گڑھ، جنوبی مدھیہ مہاراشٹر، مراٹھواڑہ اور تلنگانہ کے کچھ حصوں میں ہلکی سے درمیانی بارش کا امکان ہے۔

ادھر جموں و کشمیر میں سخت سردی کا موسم شروع ہو گیا ہے۔ عام طور پر کشمیر میں سخت سردیوں کا آغاز دسمبر کے تیسرے ہفتے کے آس پاس ہوتا ہے۔

اس کے ساتھ ہی دہلی این سی آر کے لوگوں کو آلودگی سے راحت ملنے کی امید ہے۔ محکمہ موسمیات کے مطابق تیز ہواؤں کے باعث اتوار سے ہوا کے معیار میں قدرے بہتری کا امکان ہے۔

قومی دارالحکومت دہلی میں ہوا کا معیار ہفتہ کو بھی ’انتہائی خراب‘ زمرے میں رہا۔ قومی راجدھانی میں آج ہوا کے معیار کا انڈیکس 361 ریکارڈ کیا گیا۔ ایئر کوالٹی اینڈ ویدر فورکاسٹنگ اینڈ ریسرچ (ایس اے ایف اے آر ) نے یہ اطلاع دی۔

ایس اے ایف اے آر کے حکام کے مطابق اتوار سے دہلی میں ہوا کا معیار بہتر ہونے کی امید ہے لیکن شمال مغربی سمت سے تیز ہوائیں چلنے کی وجہ سے یہ ’خراب سے معتدل ‘ زمرے میں رہے گی۔

ایس اے ایف اے آر کے مطابق’’کھیتوں میں پرالی جلانے کے واقعات کم ہو کر 1077 رہ گئے ہے اور آج دہلی کا پی ایم 2.5 فیصد رہا ہے۔‘

‘ دارالحکومت میں آج صبح تقریباً 11 بجے پی ایم 2.5 اور پی ایم 10 بالترتیب ’انتہائی بدترین‘ میں 185 اور ' بدترین ' زمرے میں 302 تھے۔

پی ایم 2.5 ہماری صحت کے لیے پی ایم 10 سے بھی زیادہ خطرناک سمجھا جاتا ہے۔

دہلی کے کچھ علاقوں میں ہوا کے معیار کا انڈیکس ’سنگین ‘ زمرے میں پایا گیا۔ اشوک وہار میں ایئر کوالٹی انڈیکس 400، جہانگیر پوری میں 429، نریلہ میں 400، پنجابی باغ میں 402، روہنی میں 406 اور وویک وہار میں 413 ریکارڈ کیا گیا۔