نئی دہلی
ہندوستان کے امریکہ میں سفیر ونئے موہن کواترا نے پیر کے روز ٹیکنالوجی کے شعبے کی بڑی شخصیات سے ملاقاتیں کیں اور مصنوعی ذہانت (اے آئی) اور کوانٹم ٹیکنالوجی جیسی جدید ٹیکنالوجیز کے مستقبل پر تبادلۂ خیال کیا۔ان ملاقاتوں میں سرمایہ کاری کے فروغ، سپلائی چین کو مزید مضبوط بنانے اور ابھرتی ہوئی ٹیکنالوجیز میں باہمی تعاون جیسے موضوعات پر بھی گفتگو کی گئی۔
کواترا نے امریکی ریٹیل کمپنی وال مارٹ کے صدر اور چیف ایگزیکٹو آفیسر کرس نکولس سے ملاقات کے دوران ہندوستان میں کمپنی کی سرمایہ کاری کے دائرے کو وسیع کرنے کے امکانات پر بات چیت کی۔ہندوستانی سفیر نے سوشل میڈیا پلیٹ فارم ایکس پر ایک پوسٹ میں کہا کہ وال مارٹ کے ساتھ ہندوستان میں ان کی سرمایہ کاری، سرمایہ کاری میں توسیع، سپلائی چین اور ابھرتی ہوئی ٹیکنالوجیز کے حوالے سے مفید گفتگو ہوئی۔
گزشتہ سال جون میں وال مارٹ کی اعلیٰ قیادت نے وزیرِ اعظم نریندر مودی سے ملاقات کر کے ہندوستان کے ساتھ اپنی شراکت داری کو مزید مضبوط بنانے کے امکانات پر تبادلۂ خیال کیا تھا۔
اس کے علاوہ، کواترا نے اسپیشل کمپیٹیٹو اسٹڈیز پروجیکٹ (ایس سی ایس پی) کے صدر اور چیف ایگزیکٹو آفیسر ایلی باجراکتاری سے بھی ملاقات کی۔انہوں نے بتایا کہ اس گفتگو کے دوران کوانٹم ٹیکنالوجی، مصنوعی ذہانت، فزیکل اے آئی اور ہندوستان و امریکہ کے درمیان ٹیکنالوجی تعاون کو مزید وسعت دینے کے امکانات پر خیالات کا تبادلہ کیا گیا۔
