منصور الدین فریدی : نئی دہلی 

وزیر اعظم نریندر مودی نے ملک میں تین زرعی قوانین کو واپس لینے کا اعلان کیا۔ یہ اعلان جمعہ کی صبح قوم کے نام ایک خطاب میں کیا۔ ملک کے کسانوں کے لیے اس خوشخبری کا اعلان مودی نے دیو دیوالی اور پرکاش پرو  کے موقع پر کیا۔قوم کو تہوار اور مبارک موقع کی مبارکباد پیش کرتے ہوئے مودی نے ساتھ ہی پیر کوریڈور ڈیڑھ سال کے وقفے کے بعد دوبارہ کھل جانے پر خوشی کا اظہار کیا ۔ مودی نے حکومت تینوں زرعی قوانین کو واپس لیتی ہے۔ وزیر اعظم مودی نے کہا کہ ہم نے تمام 3 فارم قوانین کو رد کرنے کا فیصلہ کیا ہے، اس ماہ شروع ہونے والے پارلیمنٹ کے اجلاس میں طریقہ کار شروع کریں گے۔ میں کسانوں سے گزارش کرتا ہوں کہ وہ اپنے گھر والوں کے پاس واپس جائیں اور آئیے نئے سرے سے شروعات کریں۔

تینوں نئے زرعی قوانین پچھلے ایک سال سے کسانوں کے احتجاج کی وجہ بنے تھے۔ وزیر اعظم مودی نے جمعہ کو ملک کے نام اپنے خطاب میں یہ بڑا اعلان کیا۔ اپنے 18 منٹ کے خطاب میں مودی نے کہا کہ حکومت تینوں زرعی قوانین اچھی نیت سے لائی ہے، لیکن ہم کسانوں کو اس کی وضاحت نہیں کر سکے۔

مودی نے کہا کہ ہم کسانوں کو انتہائی عاجزی کے ساتھ سمجھاتے رہے۔ گفتگو جاری رہی۔ حکومت نے قانون کی شقوں کو تبدیل کرنے پر رضامندی ظاہر کی جس پر انہیں اعتراض تھا۔

#WATCH | We have decided to repeal all 3 farm laws, will begin the procedure at the Parliament session that begins this month. I urge farmers to return home to their families and let's start afresh: PM Narendra Modi pic.twitter.com/0irwGpna2N

— ANI (@ANI) November 19, 2021

 نیک تمناؤں کے ساتھ آغاز کیا

مودی نے خطاب کے آغاز پر کہاکہ

میرے پیارے ہم وطنو، آج دیو دیپاولی کا مقدس تہوار ہے۔ آج گرو نانک دیو جی کی روشنی کا مقدس تہوار بھی ہے۔ میں دنیا کے تمام لوگوں اور تمام ہم وطنوں کو مبارکباد دیتا ہوں۔ یہ بات بھی بہت خوش آئند ہے کہ ڈیڑھ سال بعد کرتارپور صاحب راہداری دوبارہ کھل گئی ہے۔ گرو نانک دیو جی نے کہا ہے کہ دنیا میں خدمت کا راستہ اپنانے سے ہی زندگی کامیاب ہوتی ہے۔ ہماری حکومت اسی خدمت کے جذبے کے ساتھ اہل وطن کی زندگی کو آسان بنانے میں مصروف ہے۔ ہندوستان ان خوابوں کو پورا کرنے کی کوشش کر رہا ہے جنہیں کئی نسلیں حقیقت میں دیکھنا چاہتی تھیں۔

کسانوں کی فلاح و بہبود اولین ترجیح

 وزیر اعظم نے کہاکہ میں نے کسانوں کے مسائل اور چیلنجوں کو بہت قریب سے دیکھا ہے۔ جب ملک نے مجھے 2014 میں وزیر اعظم کے طور پر ملک کی خدمت کا موقع دیا تو ہم نے کسانوں کی فلاح و بہبود کو اولین ترجیح دی۔ بہت سے لوگ اس بات سے بے خبر ہیں کہ ملک کے 100 میں سے 80 کسان چھوٹے کسان ہیں۔ ان کے پاس 2 ہیکٹر سے کم اراضی ہے۔ ان کی تعداد 10 کروڑ سے زیادہ ہے۔ اس کی زندگی کی بنیاد زمین کا یہ چھوٹا سا ٹکڑا ہے۔

مودی نے کہا کہ یہ کسان اس زمین سے اپنے خاندانوں کی کفالت کرتے ہیں، اس لیے ملک کے چھوٹے کسانوں کی پریشانیوں کو دور کرنے کے لیے بازار، انشورنس، بیج اور بچت پر ہمہ جہت کام کیا گیا۔ ہم نے کسانوں کو اچھے معیار کے بیج کے ساتھ نیم کوٹڈ یوریا اور سوائل ہیلتھ کارڈ جیسی سہولیات فراہم کیں۔

ان کوششوں سے پیداوار میں اضافہ ہوا۔ ہم نے زیادہ سے زیادہ کسانوں کو فصل انشورنس اسکیم سے جوڑا ہے۔ پچھلے چار سالوں میں کسان بھائیوں اور بہنوں کو ایک لاکھ کروڑ سے زیادہ کا معاوضہ ملا ہے۔

وزیر اعظم مودی نے کہا کہ ہم نے چھوٹے کسانوں کے لیے بیمہ اور پنشن کی سہولیات بھی لائی ہیں۔ ان کی سہولیات کو مدنظر رکھتے ہوئے ہم نے براہ راست ان کے کھاتوں میں ایک لاکھ 62 ہزار کروڑ روپے منتقل کر دیے۔ اس بات کو یقینی بنانے کے لیے کہ انھیں ان کی پیداوار کی صحیح قیمت ملے، بہت سے اقدامات بھی کیے گئے۔

بہتر انفراسٹرکچر، ایم ایس پی میں اضافہ۔ جس کی وجہ سے پیداوار کے کئی سابقہ ​​ریکارڈ ٹوٹ چکے ہیں۔ ملک کی منڈیوں کو ’ای ۔این اے ایم’ اسکیم سے جوڑ کر کسانوں کو اپنی پیداوار کہیں بھی فروخت کرنے کا پلیٹ فارم فراہم کیا گیا۔ زرعی منڈیوں پر کروڑوں روپے خرچ کیے گئے۔ ملک کے زرعی بجٹ میں پہلے کے مقابلے 5 گنا اضافہ ہوا ہے۔

نیک نیتی سے قانون لائے، لیکن وضاحت نہیں کر سکے

ہماری حکومت نے کسانوں کے لیے خاص طور پر چھوٹے کسانوں کے مفاد میں یہ قانون کسانوں کے تئیں پوری لگن کے ساتھ لایا تھا، لیکن ہم کوشش کے باوجود کچھ کسانوں کو اس کی وضاحت نہیں کر سکے۔ ہم کسانوں کو نہایت عاجزی سے سمجھاتے رہے۔ گفتگو جاری رہی۔ ہم نے کسانوں کے نقطہ نظر کو سمجھنے میں کوئی کسر نہیں چھوڑی۔ حکومت نے قانون کی شقوں کو تبدیل کرنے پر رضامندی ظاہر کی جس پر انہیں اعتراض تھا۔ دوستو، آج گرو نانک دیو جی کا مقدس تہوار ہے، یہ وقت کسی پر الزام لگانے کا نہیں ہے۔ میں آج پورے ملک کو یہ بتانے آیا ہوں کہ ہم نے تینوں زرعی قوانین کو واپس لینے کا فیصلہ کیا ہے۔ اس ماہ ہم اسے واپس لینے کا عمل مکمل کر لیں گے۔