آواز دی وائس، نئی دہلی
نیشنل ہیرالڈ کیس میں سونیا گاندھی کو بھی ای ڈی نے راہل گاندھی سے پوچھ گچھ کے لیے بلایا ہے، لیکن اسپتال سے فارغ ہونے کے بعد آرام کی وجہ سے سونیا ای ڈی کے سامنے پیش نہیں ہوں گی، اس کے لیے انہوں نے ای ڈی کو خط لکھا ہے۔
اس پر جانکاری دیتے ہوئے کانگریس لیڈر جے رام رمیش نے کہا کہ کانگریس صدر سونیا گاندھی کے کورونا اور پھیپھڑوں کے انفیکشن کی وجہ سے اسپتال میں داخل ہونے کے بعد ڈاکٹروں کی طرف سے گھر پر آرام کرنے کے سخت مشورے کے پیش نظر انہوں نے آج ای ڈی کو خط لکھا ہے۔
ای ڈی سے درخواست کی گئی ہے کہ وہ صحت یاب ہونے تک ان کی پیشی کو اگلے چند ہفتوں کے لیے ملتوی کر دیں۔
دراصل ای ڈی نے سونیا گاندھی کو جمعرات کو طلب کیا ہے، لیکن اسپتال سے چھٹی ملنے کے بعد ڈاکٹروں نے انہیں آرام کا مشورہ دیا ہے۔
انفورسمنٹ ڈائریکٹوریٹ نے سونیا گاندھی کو نیشنل ہیرالڈ سے متعلق مبینہ منی لانڈرنگ کیس میں پوچھ گچھ کے لیے حاضر ہونے کے لیے سمن جاری کیا تھا۔