امرتسر
بیساکھی کی مناسبت سے پاکستان جا کر واپس آنے والے سکھ عقیدتمندوں کے جتھے میں متعدد افراد کورونا پازیٹو پائے گئے ہیں۔ واضح رہے کہ خالصہ ساجنا ڈے منانے کے لئے 12 اپریل کو تقریباً 800 سکھ زائرین پاکستان گئے تھے جن میں شرومنی گرودوارہ پربندھک کمیٹی کی جانب سے 437 زائرین بھی شامل تھے۔
بتایا جاتا ہے کہ عقیدتمندوں کے آج واپس لوٹنے پر واگھہ سرحد پر انتظامیہ نے ان کی جانچ کی جس میں 80 زائرین کورونا وائرس سے متاثر پائے گئے ۔ بقیہ مسافروں کی جانچ ابھی جاری ہے جس سے خدشہ ظاہر کیا جا رہا ہے کہ متاثرین کی تعداد میں مزیداضافہ ہوسکتا ہے۔ 80 سکھ زائرین کے کورونا پازیٹو ہونے کی خبر سے دیگر سکھ زائرین میں خوف اور اضطراب کی کیفیت ہے ۔