نئی دہلی/ آواز دی وائس

لوک سبھا میں قائدِ حزبِ اختلاف راہل گاندھی نے منگل کے روز دعویٰ کیا کہ راشٹریہ سویم سیوک سنگھ (آر ایس ایس) کے ’پروجیکٹ‘ کے تحت مختلف اداروں اور الیکشن کمیشن پر قبضہ کیا گیا ہے۔

انہوں نے لوک سبھا میں انتخابی اصلاحات پر بحث میں حصہ لیتے ہوئے سوال اٹھایا کہ چیف الیکشن کمشنر اور الیکشن کمشنروں کی تقرری والی سلیکشن کمیٹی میں چیف جسٹس کو شامل کیوں نہیں کیا گیا؟انہوں نے الزام لگایا کہ موجودہ حکومت نے دسمبر 2023 میں قانون میں تبدیلی کی تاکہ کسی الیکشن کمشنر کو اُس کے فیصلوں کے لیے سزا نہ دی جا سکے۔ انہوں نے دعویٰ کیا کہ تاریخ میں کسی وزیرِاعظم نے ایسا نہیں کیا۔

راہل گاندھی نے کہا کہ اگر ووٹ کی اہمیت ہی ختم ہو جائے تو لوک سبھا، اسمبلی یا پنچایت کسی کا کوئی وجود باقی نہیں رہے گا۔ کانگریس رہنما نے آر ایس ایس اور ہندوستانی جنتا پارٹی (بی جے پی) پر نشانہ سادھتے ہوئے کہا کہ مہاتما گاندھی کے قتل کے بعد ان کے ’پروجیکٹ‘ کا اگلا مرحلہ ہندوستان کے ادارہ جاتی ڈھانچے پر قبضہ کرنا تھا۔

انہوں نے دعویٰ کیا کہ آر ایس ایس نے ایک ایک کر کے اداروں پر قبضہ کرنا شروع کر دیا۔ سب جانتے ہیں کہ یونیورسٹیوں میں وائس چانسلرز کی تقرری کس طرح ہوتی ہے۔ راہل گاندھی کے اس بیان پر حکمراں جماعت کی جانب سے اعتراض کیا گیا۔ پارلیمانی امور کے وزیر کرن رجیجو نے کہا کہ قائدِ حزبِ اختلاف کو طے شدہ موضوع پر ہی بولنا چاہیے۔

کانگریس کے سابق صدر نے کہا کہ یہ موضوع ووٹ سے جڑا ہوا ہے اور وہ اسی بنیاد پر اپنی بات رکھ رہے ہیں۔ انہوں نے مزید کہا کہ اس کے بعد تفتیشی ایجنسیوں پر قبضہ کرنے کا ہدف رکھا گیا۔ انہوں نے دعویٰ کیا کہ الیکشن کمیشن پر قبضہ کیا جا چکا ہے۔ قائدِ حزبِ اختلاف نے یہ الزام بھی لگایا کہ الیکشن کمیشن حکمراں جماعت کے لوگوں سے ملی بھگت کرکے فیصلے کر رہا ہے اور ہر انتخاب سے پہلے وزیرِاعظم کے پروگرام کے مطابق طویل مدتی انتخابی مہم کی اجازت دی جاتی ہے۔

انہوں نے حکمراں جماعت کو نشانہ بناتے ہوئے کہا کہ یہ لوگ ورن (ذات پات) نظام پر یقین رکھتے ہیں اور اسی ترتیب میں خود کو سب سے اوپر سمجھتے ہیں۔ راہل گاندھی نے اپنی تقریر کے آغاز میں کہا کہ ملک ڈیڑھ ارب لوگوں کا تانا بانا ہے جو ووٹ کے ذریعے بُنا گیا ہے۔